Qo‘qon shahrida yashovchi shaxs chet elda ishlab chiqarilgan juda ko‘p miqdordagi dori vositalarini sotish maqsadida Toshkentga olib ketayotgan vaqtda qo‘lga tushdi. Bu haqda Oliy sud matbuot kotibi Aziz Abidov ma’lum qildi.
Tezkor tadbir davomida huquqni muhofaza qiluvchi idoralar tomonidan hech qanday hujjatlari bo‘lmagan 25 turdagi 392 million so‘mdan ziyod tibbiy dori vositalari daliliy ashyo sifatida olingan.
Qayd etilishicha, qo‘qonlik A.A. tanishi F.M.dan chet elda ishlab chiqarilgan juda ko‘p miqdordagi tibbiy dori vositalarini olib, o‘z xonadonida saqlab kelgan.
DXX va Farg‘ona viloyati bojxonasi xodimlari tomonidan o‘tkazilgan tezkor tadbirda M.J. boshqaruvidagi yuk avtomashinasi Dang‘ara tumani “Chag‘ali” qishlog‘i hududidan o‘tgan Qo‘qon—Toshkent avtomobil yo‘li bo‘ylab poytaxt tomon ketayotgan vaqtda to‘xtatilib, ko‘zdan kechirilgan.
Mazkur yuk avtomashinasida A.A.ga tegishli, hech qanday hujjatlari bo‘lmagan 10 ming dona “Metrogil 100 ml” nomli dori vositalari borligi aniqlanib, ashyoviy dalil sifatida olingan. Shundan so‘ng tadbir davomida uning uyida saqlanayotgan xorijda ishlab chiqarilayotgan dorilar fosh etilib, tegishli hujjatlar rasmiylashtirilgan.
Daliliy ashyo sifatida olingan 23 turdagi dori vositalari davlat reyestrida ro‘yxatga olinmagani, muvofiqlik sertifikatlari rasmiylashtirilmagani hamda saqlash sharoitiga amal qilinmagani maʼlum bo‘lgan. Shuningdek, dorilarni O‘zbekiston hududida sotish, tashish va tibbiyot amaliyotida qo‘llash taqiqlangani bo‘yicha xulosa berilgan.
Jinoyat ishlari bo‘yicha Dang‘ara tuman sudi tomonidan A.A. 6 yil-u 2 oy muddatga ozodlikdan mahrum etilib, sud zalidan qamoqqa olingan.
Fevral oxirlarida Toshkent shahri Mirzo Ulug‘bek tumanida dori vositalarining noqonuniy muomalaga kiritilishining oldi olingani to‘g‘risida xabar berilgandi.
Izoh (0)