ISHIDning minglab jangarilari Afg‘onistonda tayyorgarlikdan o‘tmoqda va o‘z hujumlarini rejalashtirmoqda. Bu haqda Amerikaning Daily Beast nashri xabar berdi.
Ma’lum qilinishicha, “Tolibon” rejimi ayollarga nisbatan shafqatsizlik va qarshilikdan tashqari, ISHID tahdidini ham jonlantirgan. “Tolibon”ning ISHIDni bostirishga urinish haqidagi da’volariga qaramay, Afg‘onistonda minglab jangarilar mashg‘ulotlar o‘tkazmoqda.
ISHIDning 3-yanvarda Eronda Qosim Sulaymoniyni xotirlashda sodir etgan xudkush hujumi guruhning 100 dan ortiq odam o‘ldirgan eng yirik hujumi bo‘ldi. Ismi oshkor etilmagan Afg‘oniston xavfsizlik xizmatining sobiq xodimi Daily Beast nashriga ISHID Afg‘onistonda kuchayishda davom etishini aytdi.
“Agar ‘Tolibon’ ularga yangi boshpana yaratishga ruxsat bersa, ISHID butun dunyo bo‘ylab o‘z nishonlariga hujumlar rejalashtira boshlaydi”, — dedi u.
Afg‘oniston xavfsizlik xizmati sobiq xodimi ISHID jangarilari Suriya, Bangladesh, Hindiston va Markaziy Osiyo davlatlaridan kelganini aytdi.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)