O‘zbekiston Tashqi ishlar vazirligi Moskva shahridagi Crocus City Hall’da sodir etilgan teraktni keskin qoralaydi. Bu haqda vazirlik matbuot xizmati xabar berdi.
“Terrorizmni oqlab bo‘lmaydi, biz begunoh fuqarolarga nisbatan qilingan bunday zo‘ravonlikni bir ovozdan rad etishga chaqiramiz”, — deyiladi TIV xabarida.
Vazirlik halok bo‘lganlarning oila a’zolari va yaqinlariga hamdardlik bildirdi. Shuningdek, O‘zbekistonning Moskvadagi elchixonasi Crocus City Hall savdo markazida ro‘y bergan portlash va otishma oqibatida ko‘plab qurbonlar bo‘lgani yuzasidan bayonot berdi.
Elchixona tinch aholi vakillari jabrlangani haqidagi xabarni chuqur qayg‘u bilan qabul qilganini ta’kidlagan. Qayd etilishicha, elchixona huquq-tartibot idoralari bilan yaqin aloqada bo‘lib turibdi, hozirda jabrlangan O‘zbekiston fuqarolari haqida ma’lumot kelib tushmagan.
“O‘zbekiston fuqarolarini xotirjamlikka va xavfsizlik choralariga rioya qilishga chaqiramiz”, — deyiladi bayonotda.
Fuqarolardan zarur hollarda O‘zbekistonning Moskvadagi elchixonasi konsullik bo‘limining Call markaziga (+7 499 238-36-20; +7−499 230−00−76) qo‘ng‘iroq qilish so‘raldi.
22-mart kuni Moskva viloyatidagi “Piknik” guruhining konserti bo‘lib o‘tayotgan Crocus City Hall konsert zalida nomaʼlum shaxslar o‘t ochdi. Binoda portlash sodir bo‘lgan va yong‘in boshlangan. Qurbonlar soni 40 dan oshgani aytilmoqda.
Izoh (0)