Ichki ishlar vazirligi “Kriminologik faoliyatni ilmiy taʼminlash chora-tadbirlari to‘g‘risida”gi Vazirlar Mahkamasi qarori loyihasini muhokamaga qo‘ydi.
Hujjat bilan Kriminologiya tadqiqot instituti to‘g‘risidagi nizom, Kriminologiya sohasida ilmiy-amaliy tadqiqotlarni o‘tkazish metodikasi, Jinoyatchilik omillarini kompleks ilmiy diagnoz asosida aniqlash metodikasi tasdiqlanmoqda.
Shuningdek, ichki ishlar organlari jamoat xavfsizligi bo‘linmalarining shtat birliklarini maqbullashtirish hisobidan amaldagi pul taʼminoti doirasida Ichki ishlar vazirligi Jamoat xavfsizligi departamenti boshqaruv apparati tuzilmasida 10 ta shtat birligidan iborat Strategik tahlil markazi tashkil etiladi.
Ushbu markaz zimmasiga O‘zbekiston jamoat xavfsizligi konsepsiyasi va jamoat xavfsizligini taʼminlash tizimini rivojlantirish strategiyasini amalga oshirish bo‘yicha hukumat topshiriqlari ijrosini ekspert-huquqiy va axborot-tahliliy taʼminlash vazifalari yuklatiladi.
Ichki ishlar vazirligi:
- manfaatdor vazirlik va idoralar bilan birgalikda to‘rt oy muddatda huquqbuzarliklar profilaktikasi to‘g‘risidagi qonunchilik normalarini Jinoyatchilik omillarini kompleks ilmiy diagnoz asosida aniqlash metodikasiga muvofiqlashtirish, shuningdek, “tergov profilaktikasi”ni qo‘llash mexanizmlarini belgilashni nazarda tutuvchi qonun loyihasini ishlab chiqadi va Vazirlar Mahkamasiga kiritadi;
- 2024-yil 30-dekabrga qadar kriminologiya sohasida buyurtma asosidagi ilmiy-amaliy tadqiqot loyihasini bajarish hisobidan O‘zbekiston Respublikasi Kriminologiya tadqiqot instituti faoliyatini raqamlashtirish va elektron ish yurituvini amalga oshirishni nazarda tutuvchi “E-kriminologiya” axborot tizimini yaratadi va ushbu tizimni ishga tushirish bilan bog‘liq barcha tashkiliy-texnik chora-tadbirlarni amalga oshiradi.
Bundan oldin O‘zbekistonda Makroiqtisodiy va hududiy tadqiqotlar instituti tashkil etilishi, O‘zbekiston sudlarida taftish instansiyasi joriy etilishi to‘g‘risida xabar berilgandi.
Izoh (0)