Ички ишлар вазирлиги “Криминологик фаолиятни илмий таъминлаш чора-тадбирлари тўғрисида”ги Вазирлар Маҳкамаси қарори лойиҳасини муҳокамага қўйди.
Ҳужжат билан Криминология тадқиқот институти тўғрисидаги низом, Криминология соҳасида илмий-амалий тадқиқотларни ўтказиш методикаси, Жиноятчилик омилларини комплекс илмий диагноз асосида аниқлаш методикаси тасдиқланмоқда.
Шунингдек, ички ишлар органлари жамоат хавфсизлиги бўлинмаларининг штат бирликларини мақбуллаштириш ҳисобидан амалдаги пул таъминоти доирасида Ички ишлар вазирлиги Жамоат хавфсизлиги департаменти бошқарув аппарати тузилмасида 10 та штат бирлигидан иборат Стратегик таҳлил маркази ташкил этилади.
Ушбу марказ зиммасига Ўзбекистон жамоат хавфсизлиги концепцияси ва жамоат хавфсизлигини таъминлаш тизимини ривожлантириш стратегиясини амалга ошириш бўйича ҳукумат топшириқлари ижросини эксперт-ҳуқуқий ва ахборот-таҳлилий таъминлаш вазифалари юклатилади.
Ички ишлар вазирлиги:
- манфаатдор вазирлик ва идоралар билан биргаликда тўрт ой муддатда ҳуқуқбузарликлар профилактикаси тўғрисидаги қонунчилик нормаларини Жиноятчилик омилларини комплекс илмий диагноз асосида аниқлаш методикасига мувофиқлаштириш, шунингдек, “тергов профилактикаси”ни қўллаш механизмларини белгилашни назарда тутувчи қонун лойиҳасини ишлаб чиқади ва Вазирлар Маҳкамасига киритади;
- 2024 йил 30 декабрга қадар криминология соҳасида буюртма асосидаги илмий-амалий тадқиқот лойиҳасини бажариш ҳисобидан Ўзбекистон Республикаси Криминология тадқиқот институти фаолиятини рақамлаштириш ва электрон иш юритувини амалга оширишни назарда тутувчи “E-криминология” ахборот тизимини яратади ва ушбу тизимни ишга тушириш билан боғлиқ барча ташкилий-техник чора-тадбирларни амалга оширади.
Бундан олдин Ўзбекистонда Макроиқтисодий ва ҳудудий тадқиқотлар институти ташкил этилиши, Ўзбекистон судларида тафтиш инстанцияси жорий этилиши тўғрисида хабар берилганди.
Изоҳ (0)