Oliy Majlisning Inson huquqlari bo‘yicha vakili (ombudsman)ning Qoraqalpog‘iston Respublikasidagi mintaqaviy vakili 27-sonli manzil-koloniyaga monitoring tashrifini amalga oshirdi. Bu haqda Ombudsman axborot xizmati xabar berdi.
Maʼlum qilinishicha, monitoring davomida mahkumlarning yashash sharoitlari, jumladan, yotoq joylari, yuvinish xonalari, tibbiyot bo‘limi, oshxona va oziq-ovqat mahsulotlari saqlanayotgan joylar, mehnat sharoitlari hamda uzoq muddatli uchrashuv xonalari ko‘zdan kechirildi va aniqlangan kamchiliklar bo‘yicha tavsiyalar berilgan.
Shundan so‘ng ombudsmaning Qoraqalpog‘iston Respublikasidagi mintaqaviy vakili mahkumlar bilan yakka tartibda suhbatlashib, muassasadagi sharoitlar bo‘yicha fikrlarini o‘rgangan va murojaatlarini qabul qilgan.
Shu kuni koloniyadagi barcha mahkumlar 10 nafar tor doiradagi shifokorlar guruhi tomonidan ultratovush tekshiruvi (UTT), EKG va rentgen uskunalari yordamida tibbiy ko‘rikdan o‘tkazilgan.
Tibbiy ko‘rik jarayonida 47 nafar mahkum va mahkumaga osteomielit, osteoxondroz tashxislari qo‘yilib, statsionar davo muolajalari buyurilgan. 15 nafar mahkum shifokorlar tavsiyasiga ko‘ra dori-darmon vositalari bilan taʼminlangan. Bundan tashqari, hududdagi poliklinikaning kardiologiya bo‘limida 20 nafar shaxsga ambulator va statsionar davo muolajalari o‘tkazilishi belgilangan.
Shuningdek, manzil-koloniyada jazo muddatini o‘tayotgan 4 nafar mahkumga Ijtimoiy himoya milliy agentligi Respublika boshqarmasi xodimlari tomonidan shifokor tavsiyasi bilan ko‘zoynaklar berilgan.
Izoh (0)