Surxondaryoda internetda yaroqsizligi bilan “mashhurlikka” erishgan va 16,1 mlrd so‘mga tushgan ko‘prik foydalanishga topshirildi

Surxondaryo viloyatining Qumqo‘rg‘on tumanida 6 milliard 500 million so‘mga qurilib, 19 oy xizmat ko‘rsatgan va ijtimoiy tarmoqlarda yaroqsizligi bilan “mashhurlikka” erishgan ko‘prik foydalanishga topshirildi, deya xabar berdi “Daryo” muxbiri.

Viloyatning Qumqo‘rg‘on tumanida bo‘lgan “Daryo” muxbirining xabar berishicha, jami 16 milliard 100 million so‘m sarflangan ko‘prik 2021-yilning 1-aprelidan boshlab foydalanishga topshirilgan.

“Hozircha ko‘prik foydalanishga topshirildi. Kamchiliklari bo‘lsa, albatta, quruvchi tomonidan bartaraf etiladi”, — dedi Qumqo‘rg‘on tuman hokimligi axborot xizmati rahbari Zohir Yahyoyev.

Eslatib o‘tamiz, 2020-yilning sentabr oyida “Daryo” muxbiri bilan suhbatlashgan “Ko‘ganli” mahallasida yashovchi Odina bobo Abdurahimov ko‘prik yangi qurilgan bo‘lsa-da, hech qancha vaqt o‘tmay yaroqsiz holga kelganini aytib, “Mana shu ko‘prik 1 yil 7 oy deganda shunday avariya holatiga kelib qoldi. Holbuki, bu ko‘prikka 6,5 milliard so‘m sarflangandi. Ish sifatsiz bajarilgani uchun ko‘prikning ‘umri qisqa’ bo‘ldi. Biz yo‘limiz ham shunday sifatsiz ta’mirlanib, hech qancha vaqt o‘tmasdan yaroqsiz holga kelishidan qo‘rqyapmiz”, degandi.

Shundan so‘ng Surxondaryo viloyat prokuraturasi mazkur maqolaga munosabat bildirib, prokuratura tomonidan tergovga qadar tekshiruv harakatlari boshlanganini bildirdi. Biroz vaqtdan so‘ng esa prokuratura ko‘prik qurgan quruvchi tashkilot 6 milliard 500 million so‘mlik ko‘prikni qurishda 34 million 491 ming 265 so‘mni “yeb ketganini” fosh qildi. O‘sha paytda voqealarni o‘rgangan “Sevimli” kanalining “Zamon” informatsion dasturi jurnalistlari mazkur ko‘prik qurilishiga yana 9 milliard 600 million so‘m mablag‘ ajratilganini ochiqladi. Demak, hisob-kitoblarga ko‘ra, Qumqo‘rg‘ondagi mazkur ko‘prik 16 milliard 100 million so‘mga tushdi.