Jizzax viloyatida hindistonlik hamkorlar bilan 100 dan ortiq turdagi dori-darmon vositalari ishlab chiqarish yo‘lga qo‘yiladi, deb xabar bermoqda “Dunyo” AA.
Ma’lum qilinishicha, O‘zbekistonning “Shifokor-82” va Hindistonning Avantika Medex Pvt. Ltd. kompaniyalari hamkorligida Zomin tumanida 11,5 gektar maydonda tayyor farmatsevtika mahsulotlarini ishlab chiqarishga ixtisoslashgan qo‘shma korxona bunyod etilmoqda.
Ushbu loyihani amalga oshirish uchun 30 million dollar miqdordagi mablag‘, jumladan, 15 million dollar xorijiy sarmoya yo‘naltirilmoqda. Bu yerda tabletka, kapsula, inyeksiya, gel va boshqa shakllardagi dori vositalari ishlab chiqarish o‘zlashtiriladi.
“Shifokor-82” va Avantika Medex Pvt. Ltd. kompaniyalari uzoq yillardan beri hamkorlik aloqalarini o‘rnatgan. O‘zbekistonda so‘nggi yillarda yaratilgan qulay ishbilarmonlik muhiti va xalqaro hamkorlik samaradorligi ushbu kompaniyalarni shu paytgacha Hindistondan import qilinayotgan dori vositalarini O‘zbekistonda ishlab chiqarishni yo‘lga qo‘yishga undadi.
Yangi qo‘shma korxonada tayyorlanadigan mahsulotlarning 70 foizini tashqi bozorga va 30 foizini ichki bozorga yo‘naltirish ko‘zda tutilgan.
Farmatsevtika tarmog‘ini rivojlantirish agentligi ma’lumotlarida keltirilishicha, 2007-yilda asos solingan Avantika Medex farmatsevtik mahsulotlarni ishlab chiqarish, ularning eksporti va ulgurji savdosida yetakchi kompaniyalardan biri sanaladi. Deyarli 20 yillik tajribaga ega bo‘lgan kompaniya mahsulotlari O‘zbekiston, Tojikiston, Qirg‘iziston, Armaniston, Kongo, Qozog‘iston, Rossiya, Misr, Ukraina, Belarus, Angliya, Gruziya kabi 18 ta davlat bozorida o‘z o‘rniga ega.
Izoh (0)