Жиззах вилоятида ҳиндистонлик ҳамкорлар билан 100 дан ортиқ турдаги дори-дармон воситалари ишлаб чиқариш йўлга қўйилади, деб хабар бермоқда “Дунё” АА.
Маълум қилинишича, Ўзбекистоннинг “Шифокор-82” ва Ҳиндистоннинг Avantika Меdех Pvt. Ltd. компаниялари ҳамкорлигида Зомин туманида 11,5 гектар майдонда тайёр фармацевтика маҳсулотларини ишлаб чиқаришга ихтисослашган қўшма корхона бунёд этилмоқда.
Ушбу лойиҳани амалга ошириш учун 30 миллион доллар миқдордаги маблағ, жумладан, 15 миллион доллар хорижий сармоя йўналтирилмоқда. Бу ерда таблетка, капсула, инексия, гел ва бошқа шакллардаги дори воситалари ишлаб чиқариш ўзлаштирилади.
“Шифокор-82” ва Avantika Меdех Pvt. Ltd. компаниялари узоқ йиллардан бери ҳамкорлик алоқаларини ўрнатган. Ўзбекистонда сўнгги йилларда яратилган қулай ишбилармонлик муҳити ва халқаро ҳамкорлик самарадорлиги ушбу компанияларни шу пайтгача Ҳиндистондан импорт қилинаётган дори воситаларини Ўзбекистонда ишлаб чиқаришни йўлга қўйишга ундади.
Янги қўшма корхонада тайёрланадиган маҳсулотларнинг 70 фоизини ташқи бозорга ва 30 фоизини ички бозорга йўналтириш кўзда тутилган.
Фармацевтика тармоғини ривожлантириш агентлиги маълумотларида келтирилишича, 2007 йилда асос солинган Avantika Меdех фармацевтик маҳсулотларни ишлаб чиқариш, уларнинг экспорти ва улгуржи савдосида етакчи компаниялардан бири саналади. Деярли 20 йиллик тажрибага эга бўлган компания маҳсулотлари Ўзбекистон, Тожикистон, Қирғизистон, Арманистон, Конго, Қозоғистон, Россия, Миср, Украина, Беларусь, Англия, Грузия каби 18 та давлат бозорида ўз ўрнига эга.
Изоҳ (0)