Italiyaning Busto-Arsitsio shahrida boks bo‘yicha 1-jahon litsenzion musobaqasi o‘z yakuniga yetdi.
Unda qatnashgan O‘zbekiston terma jamoasi muvaffaqiyatli ishtirok etib, Parij—2024 yozgi Olimpiya o‘yinlariga 5 ta yo‘llanmani qo‘lga kiritdi.
Qayd etish joiz, musobaqa davomida 113 mamlakatdan faqatgina O‘zbekiston va Qozog‘iston terma jamoalari 5 tadan yo‘llanmaga ega bo‘ldi. Mezbonlar 4 ta, Polsha jamoasi 3 ta litsenziyani naqd qilgan bo‘lsa, yana bir qator mamlakatlar 2 va 1 tadan (hatto, Kubada ham 1 ta) yo‘llanma bilan uyga qaytadigan bo‘ldi.
Umumiy hisobda Avstraliya boks bahslari uchun eng ko‘p yo‘llanma sohibi bo‘lib turibdi. “Yashil qitʼa” vakillarining 12 nafar (6 erkak va 6 ayol) aʼzosi Parij—2024 ishtirokchisiga aylangan. Biroq jamoa raqobat deyarli yo‘q bo‘lgan Okeaniya mintaqasi uchun tashkil etilgan musobaqada litsenziyalarga ega chiqqanini inobatga olish kerak. Qolgan yetakchi jamoalar hisobidagi yo‘llanmalar quyidagicha:
- Braziliya – 10
- O‘zbekiston – 9
- Fransiya, Italiya – 8
- Turkiya, Qozog‘iston, Xitoy – 7
1-jahon litsenzion turniridagi muvaffaqiyatsizlik hozirda Kuba jamoasi inqirozni boshdan o‘tkazayotganini yana bir karra ko‘rsatdi. Naqd 41 ta Olimpiya o‘yinlari chempionlarini yetishtirib bergan ushbu jamoa hisobida Parij—2024 O‘yinlariga hozircha 4 ta litsenziya bor, xolos.
Qayd etish joiz, Italiyadagi turnirdan so‘ng erkaklar jamoasidagi yo‘llanmalar to‘liq bo‘ldi – 7 ta. Bu borada yana bir ahamiyatli tomoni shundaki, hali hech bir jamoa erkaklar o‘rtasidagi barcha vazn toifalarida rejani to‘liq bajarmadi. Qizlar hisobida hozircha 2 ta yo‘llanma mavjud. 23-may – 3-iyun kunlari Tailandda o‘tadigan 2-jahon litsenzion turnirida 4 nafar o‘zbekistonlik bokschi qizlar ishtirok etadi.
Yakunda Xanchjou—2022 yozgi Osiyo o‘yinlari va Italiyadagi turnir orqali Parij—2024 litsenziyalarini naqd qilgan o‘zbekistonlik bokschilarni eslatib o‘tamiz:
- -51 kg: Hasanboy Do‘stmatov
- -57 kg: Abdumalik Halokov
- -63.5 kg: Ruslan Abdullayev
- -71 kg: Asadxo‘ja Mo‘ydinxo‘jayev
- -80 kg: To‘rabek Habibullayev
- -92 kg: Lazizbek Mullojonov
- +92 kg: Bahodir Jalolov
- -50 kg: Sabina Boboqulova
- -54 kg: Nigina O‘ktamova
Izoh (0)