Gaitidagi vaziyat keskinlashgan bir paytda aksar elchilar hamda boshqa yevropalik diplomatlar mazkur davlatni tark etmoqda. Bu haqda Deutsche Welle xabar berdi.
Qayd etilishicha, 10-mart kuni Gaitidagi o‘ta xavfli vaziyat tufayli Yevropa Ittifoqi delegatsiyasi a’zolari Dominikan Respublikasiga jo‘nab ketgan. Bayonotda keyingi ogohlantirishgacha yevropalik diplomatlar o‘sha yerdan ishlashi aytilgan.
Avvalroq AQSH Port-o-Prensdagi elchixona xodimlarining bir qismini olib ketganini aytgan edi. Shu bilan birga, elchixona binosini himoya qilish choralari kuchaytirilgan. Davlat departamentiga ko‘ra, AQSHning Gaitidagi elchixonasi faoliyati cheklangan, ammo hozircha ochiq qolmoqda.
So‘nggi kunlarda Gaitida qurolli to‘dalar tomonidan politsiya uchastkalari, qamoqxonalar va sud binolariga qator hujumlar uyushtirilgan. OAV maʼlumotlariga ko‘ra, hozirda to‘dalar Gaitidagi poytaxtning katta qismini, shuningdek, mamlakatning qolgan qismidagi transport aloqalarini nazorat qilmoqda. Zo‘ravonliklar avj olgani sababli Gaitidagi ikkala xalqaro aeroport ham yopilgan.
Gaitidagi hukumat va infratuzilma obyektlariga bosqinchilar hujumlari mart oyi boshidan beri davom etmoqda. Mamlakatda favqulodda holat va komendantlik soati joriy etilgan. 9-mart kuni qurollangan guruhlar poytaxt Port-o-Prensdagi hukumat binolari, politsiya idoralari, Ichki ishlar vazirligi va prezident saroyiga hujum qilgan.
Vaziyatning keskinlashishi Gaiti bosh vaziri vazifasini bajaruvchi Ariel Anrining Keniyaga tashrifi chog‘ida sodir bo‘lgan. Port-o-Prens yaqinidagi otishmalar tufayli Anri Gaitiga qaytib kela olmagan.
Gaitida tartibsizliklarning boshlanishiga Anrining Karib havzasi yetakchilari yig‘ilishida 2025-yil o‘rtalarida umumiy saylovlar o‘tkazish haqidagi kelishuvi sabab bo‘lgan. G9 va Oila guruhiga rahbarlik qiluvchi sobiq politsiyachi Jimmi Sherizye boshchiligidagi Gaiti banditlari qarorni tanqid qilib, bosh vazir iste’foga chiqmasa, fuqarolar urushi bilan tahdid qilgan.
Hozirda Gaitida prezident ham, parlament ham mavjud emas.
Izoh (0)