O‘zbekistonda uy-joylarini talabalarga ijaraga bergani uchun 2023-yilda jismoniy shaxslar 44 milliard so‘mdan ortiq daromad solig‘idan imtiyozga ega bo‘lgan. Bu haqda Soliq qo‘mitasi axborot xizmati xabar berdi.
Qayd etilishicha, ko‘chmas mulk ijarasini qonuniy ro‘yxatdan o‘tkazish — tomonlarning huquq va majburiyatlari kafolati. Soliq organlarida ro‘yxatga olingan mol-mulk ijara shartnomalari va ular bo‘yicha soliqlarni to‘lash mulkdorga uy-joyni rasman ijaraga berish va daromad olish, ijaraga oluvchiga esa undan qonuniy foydalanish imkonini beradi.
Ko‘chmas mulk ijara shartnomalarini hisobga qo‘yish “E-ijara” xizmati orqali amalga oshiriladi. Soliq qo‘mitasi ma’lumotlar bazasidan olingan axborotlarga ko‘ra, 2023-yilda:
- yuridik shaxslar o‘rtasida 145 mingga yaqin ijara shartnomasi tuzilgan. Ijara to‘lovlarining umumiy miqdori 5,3 trillion so‘mni tashkil etgan. Hisoblangan soliqlar esa 561,6 milliard so‘m.
- jismoniy shaxslar o‘rtasida 386,8 mingta ijara shartnomasi tuzilgan. Ijara to‘lovlarining umumiy miqdori 3,3 trillion so‘mni tashkil etdi. Hisoblangan soliqlar 194,8 milliard so‘m.
Soliq to‘lovchining uy-joylarni talabalarga ijaraga berishdan olgan daromadlari soliqdan ozod etilgan. Ularga daromad solig‘idan 44,4 milliard so‘m imtiyoz qo‘llanilgan.
Izoh (0)