Qozog‘iston parlamenti Majilisi pedofillar va bola o‘ldirganlarga faqat umrbod qamoq jazosi berishni nazarda tutuvchi o‘zgartirishlarni birinchi o‘qishda qabul qildi. Bu haqda parlament matbuot xizmati xabar berdi.
Gap prezident Qosim-Jo‘mart To‘qayev topshirig‘iga binoan ishlab chiqilgan “Ayollar huquqlari va bolalar xavfsizligini ta’minlash to‘g‘risida”gi qonun loyihasi haqida ketmoqda. O‘zgartirishlar qiynoq, 18 yoshga to‘lmagan yoki nochor ahvolda bo‘lgan shaxslarning sog‘lig‘iga og‘ir va o‘rtacha og‘irlikdagi zarar yetkazganlik uchun jinoiy javobgarlikni kuchaytirishni nazarda tutadi. Voyaga yetmaganlarni o‘ldirish yoki pedofiliya uchun faqat umrbod qamoq jazosi qo‘llanadi.
Bolalarga qarshi jinoyat sodir etganlar sud qarori bilan tibbiy tashkilotlarga psixologik yordam olish uchun yuborilishi mumkin. Bundan tashqari, ular nazoratga olinadi. Shuningdek, jinoyatchilarning xulq-atvoriga alohida talablarni belgilovchi qoidalar ham joriy etilishi mumkin. Huquq-tartibot idoralari ommaviy axborot vositalaridagi zo‘ravonlik haqidagi xabarlarga javob berish vakolatiga ega.
O‘z joniga qasd qilishga undash 5 yildan 9 yilgacha ozodlikdan mahrum qilishni nazarda tutadi. Bundan tashqari, suitsidni targ‘ib qilganlik, voyaga yetmagan shaxsga nisbatan bulling va kiberbulling uchun jarima belgilanmoqda.
Izoh (0)