O‘zbekistondagi avtomobillarga gaz to‘ldirish kompressor shoxobchalari faoliyatiga qisqa muddatli cheklovlar kiritilmoqda. Bu haqda Energetika vazirligi matbuot xizmati xabar berdi.
Respublika hududlarida havo haroratining pasayishi natijasida magistral gaz quvurlarida bosimning kamayishi holatlari kuzatilyapti. Shuni inobatga olgan holda, birinchi navbatda, aholi xonadonlari va ijtimoiy soha obyektlarini tabiiy gaz bilan ta’minlash maqsadida respublikadagi barcha avtomobillarga gaz to‘ldirish kompressor shoxobchalari faoliyatiga qisqa muddatli cheklovlar kiritilmoqda.
Qayd etilishicha, mazkur cheklovlarni hisobga olgan holda respublikadagi barcha benzin zapravkalarga avtobenzin mahsulotlarini qo‘shimcha miqdorlarda yetkazib berilishi ta’minlanadi.
Vazirlik iste’molchilardan yetkazilgan noqulayliklar uchun uzr so‘ragan holda, vaziyat barqarorlashgunga qadar imkon qadar tejamkorlikka rioya qilishlarini so‘radi. Gaz zapravkalar faoliyatida o‘zgarishlar kuzatilsa, qo‘shimcha ma’lumotlar beriladi.
O‘zbekistonga kelib chiqishi arktik bo‘lgan sovuq va nam havo massalari kirib kelishi 16-fevraldan boshlangandi. Respublikada havo sovishi ortidan metan zapravkalar ish jadvaliga o‘zgartirishlar kiritilishi mumkinligi haqida “Hududgaztaʼminot” matbuot xizmati avvalroq ma’lum qilgandi.
Izoh (0)