Samarqand viloyati Paxtachi tumanida elektromontyor simyog‘ochdan yiqilib vafot etdi. Bu haqda Bosh prokuratura matbuot kotibi Hayot Shamsutdinov “Daryo”ga ma’lum qildi.
Voqea 16-fevral kuni soat taxminan 18:00 larda yuz bergan. Paxtachi tumani Elektr tarmoqlari korxonasida elektromontyor bo‘lib ishlovchi 1981-yilda tug‘ilgan fuqaro B.S. “Tadbirkor” MFY hududida simyog‘ochga chiqib, elektr energiyasida vujudga kelgan nosozliklarni bartaraf etayotganida shamol sababli simyog‘och bilan birga yiqilib, vafot etgan.
Ushbu kunning o‘zida tuman elektr ta’minoti tomonidan xodimlar bilan o‘tkazilgan xavfsizlik qoidalariga rioya qilish bo‘yicha yuritilgan hujjatlar tegishli tartibda olingan.
17-fevral kuni marhumning jasadi sud-tibbiy ekspertizasidan o‘tkazilgan. Hozirda tergovga qadar tekshiruv harakatlari olib borilmoqda.
“O‘zgidromet” xabarida 16-fevral kuni Samarqand viloyatida ba’zi joylarda shamol tezligi 17-22 metr/sekundgacha, ayrim joylarda 25-28 metr/sekundgacha kuchayishi mumkinligini qayd etilgandi.
Shu yilning yanvarida Jizzax viloyatining Baxmal tumanida elektr ta’minoti korxonasi xodimi tok urishidan vafot etgandi.
Izoh (0)