Qatar Akrom Afifning het-trigi evaziga Iordaniyani mag‘lub etib, Osiyo Kubogi g‘olibiga aylandi

Futbol bo‘yicha Osiyo Kubogi finalida musobaqa mezboni Qatar terma jamoasi 10-fevral, shanba kuni Iordaniyaga qarshi bahs olib bordi.

Uchrashuvning 22-daqiqasida Qatar a’zosi Akrom Afif penaltini aniq amalga oshirib, hisobni ochdi. Birinchi bo‘lim so‘ngiga qadar ushbu hisob saqlanib qoldi.

Ikkinchi bo‘limda iordaniyaliklar faollik ko‘rsatdi va muvozanatni tikladi. 67-daqiqada Yazan al-Naimat o‘z nomini tabloga yozdirib qo‘ydi. Shundan so‘ng Akrom Afif yana 2 marta penaltidan unumli foydalandi va jamoasining chempion bo‘lishini ta’minladi.

Shu tariqa Qatar o‘z mezbonligi ostida o‘tgan musobaqa shohsupasiga ko‘tarildi. Qayd etib o‘tish joiz, Qatar 2019-yilda ham musobaqa chempioni bo‘lgandi.

Eslatib o‘tamiz, Qatar yarim finalda Eron ustidan g‘alaba qozonib, Iordaniya esa Janubiy Koreyani taslim etib, final yo‘llanmasini qo‘lga kiritgan edi.

Osiyo Kubogi

Final

10-fevral, shanba

Iordaniya — Qatar 1:3

Gollar: 0:1 – 22 Afif (penalti), 1:1 – 67 Al-Naimat, 1:2 – 73 Afif (penalti), 1:3 – 90 Afif (penalti).