Amerikaning maxsus vakili “Tolibon” tomonidan hijob bahonasida qamalgan qizlar o‘z joniga qasd qilganini aytdi

AQSHning Afg‘onistondagi ayollar ishlari va inson huquqlari bo‘yicha vakili Rina Amiriyning aytishicha, hijob tufayli “Tolibon” tomonidan hibsga olingan va qamalgan ayollarning ba’zilari kamsitilishdan qo‘rqib o‘z joniga qasd qilgan.

Rina Amiriyning aytishicha, hijob bahonasi bilan qamalgan qizlar va ayollar “sharmandalik”dan qo‘rqib, o‘zlariga zarar yetkazish va o‘z joniga qasd qilishni boshlagan.

Uning so‘zlariga ko‘ra, farmonga muvofiq amalga oshirilayotgan harakatlar “tahqirlovchi” bo‘lib, ayollar, qizlar va oilalarga halokatli ta’sir ko‘rsatadi.

Shuningdek, Amiriy “Tolibon” yuzlab ayollar va qizlarni hibsga olib, ta’qib qilgan va ulardan “o‘ta katta jarima” olganini ta’kidladi.

Shu bilan birga, u bu harakatlarni to‘xtatish va “Tolibon”ni javobgarlikka tortish kerakligini yozgan.

“Bu harakat Afg‘oniston salohiyatining yarmini yo‘q qiladi va Afg‘oniston xalqidan o‘zini o‘zi ta’minlash imkoniyatlarini tortib oladi”, — dedi Amiriy.