Birlashgan Millatlar Tashkiloti Xavfsizlik kengashi so‘nggi hisobotida “Tolibon” “Al-Qoida” bilan aloqalarini saqlab qolgani va “Al-Qoida” Afg‘onistonda sakkizta yangi o‘quv markazi tashkil etgani haqida ma’lum qildi.
Xavfsizlik kengashi hisobotida Afg‘onistonning G‘azni, Lag‘mon, Parvon va Uruzgon viloyatlarida “Al-Qoida”ning to‘rtta lageri tashkil etilgani, terrorchi tashkilot Panjshirda ham qurol-yarog‘ omborini ochgani aytiladi.
Ushbu hisobotga ko‘ra, “Al-Qoida” a’zosi Hakim al-Masri Afg‘onistonning Kunar viloyatida “Pokiston Toliboni” a’zolari uchun boshpana tayyorlash va xudkushlik hujumlarini o‘rgatish bilan shug‘ullanadi. Hisobot davomida, shuningdek, “Tolibon” va “Al-Qoida” o‘rtasidagi aloqalar haligacha yaqin ekani, bu guruh Afg‘onistonda “Tolibon” nazorati ostida “barqaror” rejimda o‘zini saqlab qolishga muvaffaq bo‘lgani aytildi.
BMT Xavfsizlik kengashining ta’kidlashicha, “Tolibon”ning “Al-Qoida” faoliyatini cheklashga urinishlari “Tolibon” va bu guruh o‘rtasida kelishmovchiliklarga olib kelgan.
Biroq hisobotda aytilishicha, “Al-Qoida”ning Afg‘onistonda qolgan a’zolari keng ko‘lamli hujumlarni rejalashtirish va uyushtirishga qodir emas. “Al-Qoida”ning Afg‘onistonda “Tolibon” bilan tarixan yaqin bo‘lgan yuqori martabali rahbarlari soni o‘ndan kam. Hisobotda 6 nafar “Al-Qoida” a’zosi qolganlarga qo‘shilish uchun Sharqiy Afg‘onistonga ko‘chirilgani ham bildirildi.
Xavfsizlik kengashi, shuningdek, Afg‘onistonning Lag‘mon, Kunar, Nangarhor, Nuriston va Parvon viloyatlarida “Al-Qoida”ning beshta madrasasi faoliyat yuritayotganini yozgan.
Boshqa tomondan, hisobotda “Pokiston Toliboni”ning bir qancha hujumlari Afg‘oniston ichidan qo‘llab-quvvatlangani, ularning ayrim qo‘mondonlari “Tolibon”dan yordam olayotgani aytiladi.
Xavfsizlik kengashining qo‘shimcha qilishicha, “Al-Qoida” “Pokiston Toliboni”ni jihoz va qurol-yarog‘ bilan ta’minlashdan tashqari, guruh kuchlarini xorijda amaliyotlar o‘tkazishga o‘rgatishda ham yordam bergan.
Izoh (0)