Тошкент шаҳри ҳокими вазифасини бажарувчи Шавкат Умурзоқов АҚШнинг Ўзбекистондаги фавқулодда ва мухтор элчиси Жонатан Хеник билан учрашди. Бу ҳақда пойтахт ҳокимлиги матбуот хизмати хабар берди.
Шавкат Умурзоқов Тошкентда давлат раҳбари ташаббуси билан ҳам маҳаллий, ҳам хорижий компаниялар учун қулай ишбилармонлик муҳити яратилганини айтган. У мазкур учрашув икки тарафлама муносабатлар ривожи учун катта туртки бўлишига ишонч билдирган.
Жонатан Хеник Тошкентнинг вақтинча резиденти сифатида шаҳар қиёфасидаги ижобий ўзгаришларни кўриб турганидан хурсанд эканлигини таъкидлаган. У АҚШ ишбилармон доираларининг Тошкент шаҳрида йўл-транспорт инфратузилмасини яхшилаш, заргарлик буюмларини ишлаб чиқариш ва экспорт қилиш, технологик ечимларни ишлаб чиқиш ва шаҳарсозликда қўллаш соҳаларида амалга оширилаётган истиқболли инвестицион лойиҳаларда иштирок этишдан манфаатдорлиги ҳақида сўзлади.
Бундан ташқари, грант дастурлари борасидаги ҳамкорлик доирасида ижтимоий аҳамиятга эга қўшма лойиҳаларни амалга ошириш имкониятлари ҳақида маълумот берди.
Ҳоким меҳмоннинг ташаббусларини қўллаб-қувватлаб, миннатдорлик билдирди, айни пайтда Тошкент шаҳрида йўл-транспорт инфратузилмасини ривожлантириш ва оптималлаштириш, микромобиллик учун шарт-шароитларни яхшилаш, қулай тўхташ жойларини яратиш, яшил транспорт тармоғи қатновини кенг кўламда жорий этишга қаратилган қатор дастурлар ишлаб чиқилаётганини айтди.
Учрашув якунида томонлар оптимал ечимларга эришиш учун мулоқотни давом эттиришга келишиб олди.
Изоҳ (0)