Ginnes rekordi mutaxassislari Eyfel minorasining 7,19 metrli maketini gugurt cho‘pdan yasalgan dunyodagi eng baland inshoot sifatida ro‘yxatdan o‘tkazishdan bosh tortdi. Bu haqda “Pravila jizni” xabar berdi.
2023-yil 27-dekabrda 47 yoshli Rishar Plo Eyfel maketi qurilishini yakunladi. Unga 706,9 ming dona gugurt va 4,2 ming soat (175 to‘liq kun) kerak bo‘ldi. Loyihaga u hammasi bo‘lib 8 yil vaqt sarflagan. Biroq, Ginnes rekordi kitobi mutaxassislari qariyb sakkiz yil davom etgan bu loyihani kitobga kiritmadi.
Ular qarorini faqat do‘konlarda sotiladigan oddiy gugurtdan foydalanish lozimligi bilan izohladi. Gugurt uchidagi yonuvchan moddani kesib tashlash mumkin, ammo gugurtni jiddiy deformatsiyalash va unga shakl berish qoidaga zid edi.
Rishar, dastlab, o‘z minorasini do‘konda sotiladigan oddiy gugurtdan qurgan. Ammo, har safar uchlarini kesib tashlashdan charchagani bois, ishlab chiqaruvchi korxonaga yonuvchan moddalarsiz tayyorlangan gugurtlarga buyurtma bergan. Bu esa Ginnes rekordlari kitobi mutaxassislari tomonidan turli e’tirozlar bo‘lishiga olib kelgan.
Ginnes rekordlar kitobi vakili Mark Makkinli vaziyatga munosabat bildirdi. Qayd etilishicha, komissiya maketni baholashda biroz qattiqqo‘llik qilgan. U tez orada Rishar Plo bilan bog‘lanishga va Ginnes qoidalarini qayta ko‘rib chiqishga tayyor ekanligini bildirdi.
Izoh (0)