Navoiy viloyati Karmana tumanida noqonuniy yo‘llar bilan o‘qishga kiritib qo‘yishni vaʼda qilgan shaxs ushlandi, deb xabar beradi Bosh prokuratura huzuridagi departament.
Ma’lum qilinishicha, departamentning Karmana tuman bo‘limi tomonidan tezkor tadbir o‘tkazilgan. Tadbirda “Sh.A.” MCHJ rahbari Sh.T. fuqaro M.Sh.ning ishonchiga kirib, uni qo‘shni Qirg‘izistondagi universitetga 2-bosqichdan o‘qishga kiritib qo‘yishi hamda o‘qishini O‘zbekistondagi oliy taʼlim muassasasiga ko‘chirib berishi evaziga 2 ming dollar va 20 million so‘mni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Bundan oldin Buxoro va Farg‘ona viloyatlarida o‘qishni ko‘chirib berish bilan bog‘liq firibgarlik holatlariga chek qo‘yilgandi. Shuningdek, O‘zbekistonning qator hududlarida o‘qishga kiritib qo‘yish uchun pul olgan OTM xodimlari qo‘lga tushgan edi.
Izoh (0)