Навоий вилояти Кармана туманида ноқонуний йўллар билан ўқишга киритиб қўйишни ваъда қилган шахс ушланди, деб хабар беради Бош прокуратура ҳузуридаги департамент.
Маълум қилинишича, департаментнинг Кармана туман бўлими томонидан тезкор тадбир ўтказилган. Тадбирда “Ш.А.” МЧЖ раҳбари Ш.Т. фуқаро М.Ш.нинг ишончига кириб, уни қўшни Қирғизистондаги университетга 2-босқичдан ўқишга киритиб қўйиши ҳамда ўқишини Ўзбекистондаги олий таълим муассасасига кўчириб бериши эвазига 2 минг доллар ва 20 миллион сўмни олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
Бундан олдин Бухоро ва Фарғона вилоятларида ўқишни кўчириб бериш билан боғлиқ фирибгарлик ҳолатларига чек қўйилганди. Шунингдек, Ўзбекистоннинг қатор ҳудудларида ўқишга киритиб қўйиш учун пул олган ОТМ ходимлари қўлга тушган эди.
Изоҳ (0)