Shahzod Sultonov sanʼatkorlar oilasida tug‘ilgan, aktyorlik bo‘yicha tahsil olgan ijodkor. U kino, serial va kliplardagi ishtiroki bilan tomoshabinlar nazariga tushgan. Uning nafaqat aktyorlik mahorati, balki kelishgan tashqi ko‘rinishi ham tomoshabinlar eʼtiborini tortadi, desak mubolag‘a bo‘lmaydi.
“Otam bokschi bo‘lishimni istagandi”
U xonanda Oybek Sultonov oilasida kenja farzand bo‘lib dunyoga kelgan. Otasi o‘z davrining mashhur xonandasi bo‘lishiga qaramay, kenja farzandining sportchi bo‘lishini orzu qilgan.
— Otam juda kichikligimdan boshlab boks bilan shug‘ullanishimni istagan. Mahallamizda boks bo‘lmagani uchun avvaliga muay-tay sport turi bilan shug‘ullanganman. U paytda sportni his qilganmanmi, yo‘qmi bilmadim. Ammo keyinchalik sport hayotimning bir bo‘lagiga aylangan. Yuqori sinfda o‘qigunga qadar bokschi bo‘laman, deb orzu qilardim. Bolalikda sho‘x bo‘lganman, ammo ko‘cha-ko‘yda urishishni yomon ko‘rardim. Chunki ustozim “Zarbangning kuchini ringda ko‘rsat”, deb ko‘p taʼkidlardi. Maktabdagi baholarim u qadar aʼlo bo‘lmagan, chunki asosiy vaqtimni sport zalida o‘tkazardim, — deydi Shahzod Sultonov.
“Moddiy qiyinchiliksiz ulg‘ayganmiz”
Aktyor bolaligi go‘zal o‘tgani, otasi ularning yaxshi yashashi uchun barcha imkoniyatlarni yaratib bergani haqida gapirdi.
— Ko‘pchilik ijodkorlar intervyu berganda bolalikda moddiy qiynalgani, ishlagani haqida gapiradi. Maqtana olamanki, menda bunday muammolar umuman bo‘lmagan. Otam to‘ylarga borar va topgan daromadini farzandlariga sarflardi. Hech qachon puldan zoriqqanimizni eslolmayman. Kenja farzand bo‘lganim uchunmi meni ko‘proq erkalatishardi. Hozir o‘ylab qarasam, bolaligim shahzodalarga xos o‘tgan. Chunki og‘zimdan chiqqan narsani muhayyo qilishardi, — deydi aktyor Shahzod Sultonov.
“Sendan aktyor chiqmaydi”
Shahzod Sultonov ustozlarning ishonchsizligi va uch yil faqat massovka rollarda suratga tushgani haqida gapirdi.
— Sanʼatkor bo‘lishimga oilam hech qachon qarshi bo‘lmagan, sanʼat institutiga o‘qishga kirganimda ham quvonishgan. Ammo hech qayerda otamning nomini sotmaganman. Tabiatan bunday yo‘l tutishni yomon ko‘raman. Ammo ustozlardan birining gapi yuragimga qattiq botgan. “Sendan aktyor chiqmaydi, plastikang yo‘q”, degan. Hali aktyor bo‘lishimni isbotlayman deb qayerda kasting o‘tkazilsa ishtirok etardim. Ammo 3 yilgacha birorta syomkada massovkadan boshqa rolni berishmagan. Uchinchi kursda bir klipmeyker klipga chaqirgan. “Bitta sahna bor, seni yaqqol olaman. Faqat u sahna tushdan keyin olinadi”, degan. Xursand bo‘lib yoz chillasida bu sahna suratga olinishini kutib o‘tirganman. Ammo ha deganda u chaqiravermagan. Yoniga borib “Aka, meni sahnam qachon suratga olinadi”, desam “Voy, esimdan chiqibdi-ku, syomka tugadi. Keyingi klipga olaman”, degan. Rosa xafa bo‘lganman, shu qilganingiz uchun ham o‘zim rejissor bo‘laman, deb ketgandim, — deydi aktyor Shahzod Sultonov.
“Sardor Rahimxon meni qo‘llagan”
Aktyor Sardor Rahimxondan minnatdorligi, u sabab ilk katta rolini ijro etgani haqida gapirdi.
— Sardor aka bilan tanishuvimiz juda qiziq kechgan. Institutda magistrlarning diplom ishi namoyish etiladigan bo‘lgan, Sardor Rahimxonni taklif etishgan. O‘sha tadbirda men ham kursdoshim bilan ishtirok etdik va so‘ngida Sardor Rahimxon bilan suratga tushdik. O‘shanda u inson bilan tanishib qolganman. Keyinchalik u inson klipi uchun kasting o‘tkazayotgani haqida eshitib qoldim va telefon raqamini topib qo‘ng‘iroq qildim. Eng qizig‘i, u inson meni tanidi, agar rejissor qarshilik qilmasa, klipida tushishim mumkinligini aytdi. Baʼzi insonlar ishonchsizlik bildirayotgan bir paytda u insonning yordam qo‘lini cho‘zgani katta kuch bag‘ishlagan. Sardor akadan odamning ortidan gapirmaslikni va yomon gumonda bo‘lmaslikni ham o‘rgandim, — deydi aktyor Shahzod Sultonov.
“Ayollardan takliflar ko‘p bo‘lgan”
Aktyor endi tanilib kelayotgani paytda baʼzi ayollardan “g‘alati” takliflar olgani haqida so‘zlab berdi.
— Bu haqida gapirish noqulay, ammo juda ko‘p ayollar bunday takliflar bergan. Birinchi marta eshitganimda “shok” holatiga tushganman. Bir opa qo‘ng‘iroq qilgan va muhim masalada gaplashib olishini aytgan. “Ijodingiz haqida” degani uchun ham kelishilgan yerga borganman. “Sizga prodyuser kerak, pul tikamiz, ko‘taramiz”, deyapti. “Opa, men xonanda emas, aktyorman. Menga homiy kerak emas”, dedim. “Balki mana bunday mashinalar haydashni istarsiz”, dedi. Keyin bilsam uning taklifi butunlay boshqa mavzuda ekan. Unga “ha” yoki “yo‘q” deb javob berishimning o‘zi kifoya edi.
Afsuski, barmoqlar barobar bo‘lmaganidek, erkaklar orasida ham, ayollar orasida ham bunday insonlar topiladi. U insonning kasbi bilan bog‘liq emas. Sanʼatda shunday aktrisalarni ham uchratganmanki, erkak kishining ko‘ziga tik qarab gapirmaydi, — deydi aktyor Shahzod Sultonov.
“Aktrisaga uylanishim mumkin, faqat...”
Shahzod Sultonovning shaxsiy hayoti bilan bog‘liq mish-mishlar bisyor. U Sug‘diyona Azimova, Feruza Normatova va Zarina Yo‘ldosheva bilan ishqiy munosabatda bo‘lgani haqidagi mish-mishlar omma orasida tarqalgandi.
— Uch aktrisa bilan ham ijodiy loyihalarda birga ishlaganmiz. Hammasini hurmat qilaman, ammo ular bilan o‘rtamizda hech qanday munosabat bo‘lmagan. “Aktrisa bilan oila qurishingiz mumkinmi?” deb ko‘p so‘rashadi. Albatta mumkin, faqat undan keyin sanʼatdan ketishini istayman. Chunki oilali ayolni eridan boshqa erkaklar ko‘rmasligi kerak, u omma eʼtiboridan chetda yurgani maʼqul, — deydi aktyor Shahzod Sultonov.
“Ko‘zim ko‘rmay qoladi, deb qo‘rqqandim”
Aktyor bir yil avval Andijonda boks bo‘yicha katta jang o‘tkazdi. Jang uning g‘alabasi bilan yakunlangan bo‘lsa-da, u ko‘zidan jiddiy jarohat oldi.
— Aktyorlikda yuz muhim ahamiyatga ega, boksda esa u birinchi galda nishonga olinadi. O‘tgan yili tavakkal qilib, jangga rozi bo‘ldim. Ammo jang oldi bu aktyorlik karyeramga jiddiy xavf solishi haqida ko‘p gapirishdi. Bundan tashqari, ko‘pchilik insonlar ishonchsizlik bildirishdi. “Aktyor-ku, eplay olmaydi”, deganlar ko‘p bo‘ldi. Jangda yutsam ham, yutqazsam ham odamlarga “mavzu” bo‘lishimni bilardim. Raqibimning zarbasidan ko‘ra, himoyasi kuchli ekan, bu meni ancha charchatdi. Yuzimdan ikkita jiddiy zarba oldim, yuzim uvishib hech narsani his qilmay qoldi. Undan keyin bir ko‘zim xiralashib, asta shishib umuman ko‘rmay qoldi. Ammo jang mening g‘alabam bilan yakunlandi. “G‘olib bo‘la olmaysan”, deb yuzimga yoki ortimdan aytgan insonlar oldida yuzim yorug‘ bo‘lganidan juda quvondim, ammo ancha vaqtgacha syomkalarda ishtirok etolmadim. Eng yomoni, ko‘zim ko‘rmay qolsa-chi deb qo‘rqqandim, — deydi aktyor Shahzod Sultonov.
Do‘stlarning ayrilishiga pul sababmi?
Shahzod Sultonov va Shohrux Hamdamov ham bir paytlar yaqin do‘st bo‘lgan. Afsuski, hozirda moliyaviy kelishmovchilik sabab ularning munosabati buzilgan.
— Shohrux o‘zi suratga olayotgan filmiga taklif etgan. “Ulug‘bek Qodirov va Farrux Soipov ‘Oshiqlarʼ filmida birga suratga tushib, fayz olgan. Biz ham bir filmda suratga tushaylik”, degan. Rozi bo‘lganman. Ammo gonorar keyinroq berilishini aytgandi. To‘g‘ri, syomkaga borganimda yo‘l puli berilgan, ammo umumiy summa keyinroq berilishini aytgan. Suratga olish ishlari yakunlanganidan keyin avariyaga uchrab qoldim. Ertalab tonggi 4:00 da Shohruxga qo‘ng‘iroq qildim. Chunki o‘sha paytda pul kerak edi. “Haligi puldan berasanmi? Avariyaga uchradim”, desam hol-ahvol so‘rab “Yo‘q, hozir u pulni ololmaymiz, hisobga tushmagan. Keyinroq oldingga o‘taman”, dedi. Ammo u film ijodkorlaridan hech kim kelmadi va gonorarimni ham bermadi. Aslida, bu gapni aytmoqchi emasdim. Faqatgina ko‘rsatuvda sherdan qo‘rqqanim uchun bunga majbur bo‘lganman, — deydi aktyor Shahzod Sultonov.
“Durdona Qurbonova bilan ijro etgan rolimdan afsuslanaman”
Aktyor “Hindi shou” loyihasida suratga tushgan rolidan uyalishi va iloji bo‘lsa uni umuman ko‘rishlarini istamasligini aytib o‘tdi.
— “Hindi shou” loyihasida suratga tushganimdan haligacha afsuslanaman. Unda Durdona Qurbonova bilan rol ijro etib, g‘alaba qozongandik. Ammo unda hind kinosiga taqlid qilib, qo‘l ushlashgan sahnalarimiz bor. Ishonasizmi, ana shu rolni ijro etganim uchun o‘zimni kechirolmayman. Tomoshabinlar iloji bo‘lsa men chiqqan sonni ko‘rmasliklarini istayman, — deydi aktyor Shahzod Sultonov.
Izoh (0)