Шаҳзод Султонов санъаткорлар оиласида туғилган, актёрлик бўйича таҳсил олган ижодкор. У кино, сериал ва клиплардаги иштироки билан томошабинлар назарига тушган. Унинг нафақат актёрлик маҳорати, балки келишган ташқи кўриниши ҳам томошабинлар эътиборини тортади, десак муболаға бўлмайди.
“Отам боксчи бўлишимни истаганди”
У хонанда Ойбек Султонов оиласида кенжа фарзанд бўлиб дунёга келган. Отаси ўз даврининг машҳур хонандаси бўлишига қарамай, кенжа фарзандининг спортчи бўлишини орзу қилган.
— Отам жуда кичиклигимдан бошлаб бокс билан шуғулланишимни истаган. Маҳалламизда бокс бўлмагани учун аввалига муай-тай спорт тури билан шуғулланганман. У пайтда спортни ҳис қилганманми, йўқми билмадим. Аммо кейинчалик спорт ҳаётимнинг бир бўлагига айланган. Юқори синфда ўқигунга қадар боксчи бўламан, деб орзу қилардим. Болаликда шўх бўлганман, аммо кўча-кўйда уришишни ёмон кўрардим. Чунки устозим “Зарбангнинг кучини рингда кўрсат”, деб кўп таъкидларди. Мактабдаги баҳоларим у қадар аъло бўлмаган, чунки асосий вақтимни спорт залида ўтказардим, — дейди Шаҳзод Султонов.
“Моддий қийинчиликсиз улғайганмиз”
Актёр болалиги гўзал ўтгани, отаси уларнинг яхши яшаши учун барча имкониятларни яратиб бергани ҳақида гапирди.
— Кўпчилик ижодкорлар интервью берганда болаликда моддий қийналгани, ишлагани ҳақида гапиради. Мақтана оламанки, менда бундай муаммолар умуман бўлмаган. Отам тўйларга борар ва топган даромадини фарзандларига сарфларди. Ҳеч қачон пулдан зориққанимизни эслолмайман. Кенжа фарзанд бўлганим учунми мени кўпроқ эркалатишарди. Ҳозир ўйлаб қарасам, болалигим шаҳзодаларга хос ўтган. Чунки оғзимдан чиққан нарсани муҳайё қилишарди, — дейди актёр Шаҳзод Султонов.
“Сендан актёр чиқмайди”
Шаҳзод Султонов устозларнинг ишончсизлиги ва уч йил фақат массовка ролларда суратга тушгани ҳақида гапирди.
— Санъаткор бўлишимга оилам ҳеч қачон қарши бўлмаган, санъат институтига ўқишга кирганимда ҳам қувонишган. Аммо ҳеч қаерда отамнинг номини сотмаганман. Табиатан бундай йўл тутишни ёмон кўраман. Аммо устозлардан бирининг гапи юрагимга қаттиқ ботган. “Сендан актёр чиқмайди, пластиканг йўқ”, деган. Ҳали актёр бўлишимни исботлайман деб қаерда кастинг ўтказилса иштирок этардим. Аммо 3 йилгача бирорта сёмкада массовкадан бошқа ролни беришмаган. Учинчи курсда бир клипмейкер клипга чақирган. “Битта саҳна бор, сени яққол оламан. Фақат у саҳна тушдан кейин олинади”, деган. Хурсанд бўлиб ёз чилласида бу саҳна суратга олинишини кутиб ўтирганман. Аммо ҳа деганда у чақиравермаган. Ёнига бориб “Ака, мени саҳнам қачон суратга олинади”, десам “Вой, эсимдан чиқибди-ку, сёмка тугади. Кейинги клипга оламан”, деган. Роса хафа бўлганман, шу қилганингиз учун ҳам ўзим режиссёр бўламан, деб кетгандим, — дейди актёр Шаҳзод Султонов.
“Сардор Раҳимхон мени қўллаган”
Актёр Сардор Раҳимхондан миннатдорлиги, у сабаб илк катта ролини ижро этгани ҳақида гапирди.
— Сардор ака билан танишувимиз жуда қизиқ кечган. Институтда магистрларнинг диплом иши намойиш этиладиган бўлган, Сардор Раҳимхонни таклиф этишган. Ўша тадбирда мен ҳам курсдошим билан иштирок этдик ва сўнгида Сардор Раҳимхон билан суратга тушдик. Ўшанда у инсон билан танишиб қолганман. Кейинчалик у инсон клипи учун кастинг ўтказаётгани ҳақида эшитиб қолдим ва телефон рақамини топиб қўнғироқ қилдим. Энг қизиғи, у инсон мени таниди, агар режиссёр қаршилик қилмаса, клипида тушишим мумкинлигини айтди. Баъзи инсонлар ишончсизлик билдираётган бир пайтда у инсоннинг ёрдам қўлини чўзгани катта куч бағишлаган. Сардор акадан одамнинг ортидан гапирмасликни ва ёмон гумонда бўлмасликни ҳам ўргандим, — дейди актёр Шаҳзод Султонов.
“Аёллардан таклифлар кўп бўлган”
Актёр энди танилиб келаётгани пайтда баъзи аёллардан “ғалати” таклифлар олгани ҳақида сўзлаб берди.
— Бу ҳақида гапириш ноқулай, аммо жуда кўп аёллар бундай таклифлар берган. Биринчи марта эшитганимда “шок” ҳолатига тушганман. Бир опа қўнғироқ қилган ва муҳим масалада гаплашиб олишини айтган. “Ижодингиз ҳақида” дегани учун ҳам келишилган ерга борганман. “Сизга продюсер керак, пул тикамиз, кўтарамиз”, деяпти. “Опа, мен хонанда эмас, актёрман. Менга ҳомий керак эмас”, дедим. “Балки мана бундай машиналар ҳайдашни истарсиз”, деди. Кейин билсам унинг таклифи бутунлай бошқа мавзуда экан. Унга “ҳа” ёки “йўқ” деб жавоб беришимнинг ўзи кифоя эди.
Афсуски, бармоқлар баробар бўлмаганидек, эркаклар орасида ҳам, аёллар орасида ҳам бундай инсонлар топилади. У инсоннинг касби билан боғлиқ эмас. Санъатда шундай актрисаларни ҳам учратганманки, эркак кишининг кўзига тик қараб гапирмайди, — дейди актёр Шаҳзод Султонов.
“Актрисага уйланишим мумкин, фақат...”
Шаҳзод Султоновнинг шахсий ҳаёти билан боғлиқ миш-мишлар бисёр. У Суғдиёна Азимова, Феруза Норматова ва Зарина Йўлдошева билан ишқий муносабатда бўлгани ҳақидаги миш-мишлар омма орасида тарқалганди.
— Уч актриса билан ҳам ижодий лойиҳаларда бирга ишлаганмиз. Ҳаммасини ҳурмат қиламан, аммо улар билан ўртамизда ҳеч қандай муносабат бўлмаган. “Актриса билан оила қуришингиз мумкинми?” деб кўп сўрашади. Албатта мумкин, фақат ундан кейин санъатдан кетишини истайман. Чунки оилали аёлни эридан бошқа эркаклар кўрмаслиги керак, у омма эътиборидан четда юргани маъқул, — дейди актёр Шаҳзод Султонов.
“Кўзим кўрмай қолади, деб қўрққандим”
Актёр бир йил аввал Андижонда бокс бўйича катта жанг ўтказди. Жанг унинг ғалабаси билан якунланган бўлса-да, у кўзидан жиддий жароҳат олди.
— Актёрликда юз муҳим аҳамиятга эга, боксда эса у биринчи галда нишонга олинади. Ўтган йили таваккал қилиб, жангга рози бўлдим. Аммо жанг олди бу актёрлик карьерамга жиддий хавф солиши ҳақида кўп гапиришди. Бундан ташқари, кўпчилик инсонлар ишончсизлик билдиришди. “Актёр-ку, эплай олмайди”, деганлар кўп бўлди. Жангда ютсам ҳам, ютқазсам ҳам одамларга “мавзу” бўлишимни билардим. Рақибимнинг зарбасидан кўра, ҳимояси кучли экан, бу мени анча чарчатди. Юзимдан иккита жиддий зарба олдим, юзим увишиб ҳеч нарсани ҳис қилмай қолди. Ундан кейин бир кўзим хиралашиб, аста шишиб умуман кўрмай қолди. Аммо жанг менинг ғалабам билан якунланди. “Ғолиб бўла олмайсан”, деб юзимга ёки ортимдан айтган инсонлар олдида юзим ёруғ бўлганидан жуда қувондим, аммо анча вақтгача сёмкаларда иштирок этолмадим. Энг ёмони, кўзим кўрмай қолса-чи деб қўрққандим, — дейди актёр Шаҳзод Султонов.
Дўстларнинг айрилишига пул сабабми?
Шаҳзод Султонов ва Шоҳрух Ҳамдамов ҳам бир пайтлар яқин дўст бўлган. Афсуски, ҳозирда молиявий келишмовчилик сабаб уларнинг муносабати бузилган.
— Шоҳрух ўзи суратга олаётган фильмига таклиф этган. “Улуғбек Қодиров ва Фаррух Соипов ‘Ошиқлар’ фильмида бирга суратга тушиб, файз олган. Биз ҳам бир фильмда суратга тушайлик”, деган. Рози бўлганман. Аммо гонорар кейинроқ берилишини айтганди. Тўғри, сёмкага борганимда йўл пули берилган, аммо умумий сумма кейинроқ берилишини айтган. Суратга олиш ишлари якунланганидан кейин аварияга учраб қолдим. Эрталаб тонгги 4:00 да Шоҳрухга қўнғироқ қилдим. Чунки ўша пайтда пул керак эди. “Ҳалиги пулдан берасанми? Аварияга учрадим”, десам ҳол-аҳвол сўраб “Йўқ, ҳозир у пулни ололмаймиз, ҳисобга тушмаган. Кейинроқ олдингга ўтаман”, деди. Аммо у фильм ижодкорларидан ҳеч ким келмади ва гонораримни ҳам бермади. Аслида, бу гапни айтмоқчи эмасдим. Фақатгина кўрсатувда шердан қўрққаним учун бунга мажбур бўлганман, — дейди актёр Шаҳзод Султонов.
“Дурдона Қурбонова билан ижро этган ролимдан афсусланаман”
Актёр “Ҳинди шоу” лойиҳасида суратга тушган ролидан уялиши ва иложи бўлса уни умуман кўришларини истамаслигини айтиб ўтди.
— “Ҳинди шоу” лойиҳасида суратга тушганимдан ҳалигача афсусланаман. Унда Дурдона Қурбонова билан роль ижро этиб, ғалаба қозонгандик. Аммо унда ҳинд киносига тақлид қилиб, қўл ушлашган саҳналаримиз бор. Ишонасизми, ана шу ролни ижро этганим учун ўзимни кечиролмайман. Томошабинлар иложи бўлса мен чиққан сонни кўрмасликларини истайман, — дейди актёр Шаҳзод Султонов.
Изоҳ (0)