Yevropa omborlaridagi gaz zaxiralari 70 foizdan pastladi

Issiq ob-havo Yevropaga yoqilg‘ini tejashga yordam bermoqda. Shunga qaramay, mintaqa omborlaridagi gaz zaxiralari darajasi 70 foizdan pastga tushdi.

Yevropadagi tabiiy gaz zaxiralari darajasi jahon bozori uchun asosiy ko‘rsatkichlardan biridir.

Joriy ko‘rsatkich 69,14 foizga yetdi — so‘nggi besh yildagi o‘rtacha ko‘rsatkichdan 14 foiz punktga yuqori, deyiladi Gas Infrastructure Europe xabarida.

Garchi Yevropa gaz va uning zaxiralaridan foydalanishni faol ravishda cheklayotgan bo‘lsa-da, zaxiralarning hozirgi darajasi 2023 va 2020-yillardagi xuddi shu davrga nisbatan sezilarli darajada past.

3-fevral kunida (dam olish kuni) gaz zaxiralari 0,18 foiz punktga kamaydi. Yanvar oyining uchinchi o‘n kunligidan boshlab iliq ob-havo sharoitida gaz sarfi so‘nggi besh yildagi o‘rtacha ko‘rsatkichdan sezilarli darajada past bo‘ldi.

Yevropa LNG terminallari 2023-yil yanvar oyida o‘rtacha 51 foiz unumdorlikda ishlagan bo‘lsa, fevral oyi boshidan buyon ularning o‘rtacha yuklanishi 47 foizni tashkil etdi.