O‘zbekistonda 68 nafar bolaning o‘limiga, 16 nafar bolaning og‘ir, 2 nafar bolaning esa yengil tan jarohati olib, nogiron bo‘lib qolishiga sabab bo‘lgan “Dok-1 Maks” siropi bilan bog‘liq jinoyat ishini ko‘rib chiqayotgan sud tergovini yakunlab, muzokaraga o‘tdi. Bu haqda sudda qatnashgan “Daryo” jurnalisti xabar berdi.
2023-yilning 11-avgust kuni boshlangan sud 2024-yilning 5-fevral kuni tergovni yakunlab, sudning muzokara qismiga o‘tganini ma’lum qildi.
Biroq prokuror muzokaraga tayyor bo‘lmagani bois suddan bir hafta muddat so‘radi.
Sud muzokara so‘zi uchun davlat ayblovchisi hamda advokatlarga muddat berdi. Sud 9-fevral kuni soat 10:30 gacha tanaffus e’lon qildi.
Eslatib o‘tamiz, 2022-yilning oktyabr, noyabr va dekabr oylarida bolalar shamollashiga qarshi qo‘llanilgan “Dok-1 Maks” va “Ambronol” siropi 2023-yilning yanvar oyida mamlakatda “Dok-1 Maks” fojiasi sifatida bo‘y ko‘rsatdi. Fojianing dastlabki qurbonlari haqida xabar bergan mas’ullar marhum bolalar soni 65 nafar ekanini ochiqlagan bo‘lsa, keyinchalik bu raqamlar 68 nafarga yetgani ma’lum bo‘ldi. Mazkur jinoyat ishi bo‘yicha dastlab 21 nafar shaxs ayblangan bo‘lsa, keyinchalik qo‘shimcha jinoyat ishi biriktirilib, ayblanuvchilar 23 nafarga yetdi. Ularning dastlab 7 nafariga, keyinchalik yana 2 nafariga — jami 9 nafariga nisbatan qamoqqa olish tarzidagi ehtiyot chorasi qo‘llanilgan.
Izoh (0)