Ayni kunlarda Buxoro viloyati, Olot tumani “Qirlishon” hududidagi Dengizko‘l yon bag‘rida ekologik holatni yaxshilash ishlari olib borilyapti, deb xabar bermoqda viloyat hokimligi matbuot xizmati.
Qayd etilishicha, Orol dengizining suvi qurigan tubi va Orolbo‘yi mintaqasidan ko‘tarilayotgan qum, tuz va chang zarrachalarining salbiy taʼsirini kamaytirish hamda global iqlim o‘zgarishlarining salbiy taʼsirini yanada yumshatish maqsadida “Yashil qoplama” hosil qilish ishlari olib borilmoqda. Cho‘l massivlarida 40 ming gektardan ziyod hududda ekish ishlari rejalashtirilgan bo‘lib, bu ishlarda 40 ga yaqin haydov texnikasi vositasida 100 tonnadan ortiq saksovul urug‘i, 150 dan ortiq ishchi kuchi jalb qilingan.
Viloyat hokimi Botir Zaripov u yerga borib, amalga oshirilayotgan ishlar bilan yaqindan tanishgan va tegishli ko‘rsatmalarni bergan.
Xabarda qo‘shimcha qilinishicha, 2023-yili Jondor tumani Qoraqum cho‘lida 20 ming gektar, Shofirkon tumanida, kimsasiz Qizilqum cho‘li bag‘rida 20 ming gektar yer maydonida ekish ishlari amalga oshirilgan. Bunda foydalanilayotgan jami 31 ta transport vositasi viloyat davlat O‘rmon xo‘jaligi boshqarmasi tizimidagi tumanlar o‘rmon xo‘jaliklari texnika parklari tasarrufida bo‘lib, ayni kunda yuzdan ziyod ishchi kuchi bu dolzarb ishga jalb qilingan.
Izoh (0)