Qirg‘iziston prezidenti samolyotida to‘rt nafar bemor Turkiyaga davolanishga jo‘natildi. Bu haqda mamlakat hukumatining “Mediashtab” Telegram kanali xabar berdi.
Ma’lum qilinishicha, 3-fevral kuni Bishkekdagi IESda jabrlangan ikki kishi, shuningdek, Bishkek yaqinida Mi-8 harbiy vertolyoti qulashi oqibatida jarohatlangan ikki nafar harbiy xizmatchi Qirg‘iziston prezidenti Sadir Japarov topshirig‘iga ko‘ra davolanishni davom ettirish uchun Turkiyadagi ixtisoslashtirilgan klinikalardan biriga jo‘natildi.
-jnKd5Xv_.jpg)
Bemorlarga oila a’zolari va ikki nafar shifokor hamrohlik qiladi. Ularning barchasi prezidentning TU-154 samolyoti orqali Turkiyaga yuborildi.
“Jabrlanganlarga yordam ko‘rsatish bo‘yicha barcha chora-tadbirlar Qirg‘iziston prezidenti shaxsan nazoratida bo‘lib, bemorlar, ularning yaqinlari va tibbiyot xodimlarini Turkiyaga yetkazish uchun moliyaviy mablag‘ ajratildi”, — deyiladi xabarda.
Bishkekdagi issiqlik elektr stansiyasida portlash 2-fevralga o‘tar kechasi yuz bergandi. Hodisa oqibatida 5 kishi jabrlangan. Ulardan ikki nafari ambulator davolanishga yuborilgan, yana ikki nafari kuyish jarohati bilan reanimatsiyada og‘ir ahvolda edi.
17-yanvar kuni Mi-8 vertolyoti Bishkek yaqinida o‘quv parvozi vaqtida qulab tushgandi. Vertolyotda 11 kishi bo‘lgan. Ulardan biri halok bo‘lgan, qolganlari kasalxonaga yotqizilgan.
Izoh (0)