Birlashgan Arab Amirliklari mamlakatda birinchi kazino ochilishini tasdiqladi, u Ras al-Xaymadagi Wynn Marjan kurortining bir qismi bo‘ladi. Bu haqda Arabian Business xabar berdi.
Amirlik hozirda Singapur va Amerika qoidalariga asoslangan qimor sektorini tartibga solish uchun mahalliy qonunchilikni yaratmoqda. BAAdagi qimorxona Las-Vegasda faoliyat ko‘rsatuvchi kazinodan ikki baravar katta bo‘ladi. Uning maydoni 18,5 ming kvadrat metrni tashkil qiladi va 2026-yilda ochilishi rejalashtirilgan.
Wynn Resorts mehmonxona operatori Las-Vegas, Boston va Makaodagi kazino mehmonxonalari bilan tanilgan. U 2022-yil yanvar oyida Ras al-Xayma amirligida “o‘yin zonasi”ga ega kurort qurish rejasini e’lon qilgandi. Al-Marjan orolidagi yangi majmuada 1000 ta mehmonxona xonasi, kamida 10 ta restoran va dam olish xonalari, yirik anjumanlar markazi, savdo hamda kurort markazlari bo‘ladi.
Dubay o‘z hududida qimor o‘yinlarini tashkil etishga hozircha ruxsat berishni rejalashtirmayotgani haqida avvalroq mahalliy Turizm va savdo marketing korporatsiyasi rahbari Issam Kazim xabar bergandi. Bu e’lon Dubayda 2018-yildan beri faoliyat yuritib kelayotgan besh yulduzli Caesars Palace kurortida kazinolar ochilishi mumkinligi haqidagi mish-mishlar fonida paydo bo‘lgan. Dubaydagi Caesars Palace mehmonxonasi Amerikaning Caesars Entertainment kompaniyasining dunyoda kazinosi bo‘lmagan yagona kurorti hisoblanadi.
Ma’lumot uchun, iyul oyida Qirg‘izistonda kazinolar qonuniylashtirilgandi, biroq ular mamlakat fuqarolari uchun emas.
Izoh (0)