Qozog‘iston Yaqin Sharq va Afrika mamlakatlariga tinchlikparvar kuchlarini yuboradi, deb xabar berdi Tengrinews.
Bunday taklif prezident Qosim-Jo‘mart To‘qayev tomonidan deputatlar muhokamasiga kiritilgan. Parlament a’zolari tinchlikparvar kuchlarni yuborish uchun yakdil ovoz berdi.
Qozog‘iston BMT missiyalarida ishtirok etish uchun 430 nafargacha harbiyni jo‘natadi:
- BMTning Golan tepaliklaridagi kuzatuvchi kuchlariga (UNDOF, Suriya —Isroil).
- BMTning sulh shartlari bajarilishini nazorat qilish organlariga (UNTSO, Falastin — Isroil).
- Janubiy Sudan Respublikasidagi BMT missiyasiga (UNMISS, Janubiy Sudan).
- BMTning Abyee uchun vaqtinchalik xavfsizlik kuchlariga (UNISFA, Sudan)
“Qozog‘iston Qurolli Kuchlari alohida harbiy xizmatchilarni ham harbiy kuzatuvchi, ham shtab ofitserlari, shuningdek, BMT missiyalarida eng ko‘p talab qilinadigan piyoda, tibbiy, razvedka, muhandislik bo‘linmalari bilan taʼminlashga tayyor”, — dedi mudofaa vaziri Ruslan Jaqsiliqov parlament palatalarining qo‘shma majlisida.
Vazir 139 nafar harbiy xizmatchidan iborat birinchi mustaqil milliy tinchlikparvar kontingenti harbiy texnika, qurol-yarog‘ va mol-mulk bilan birgalikda Golan tepaliklarida harakatni nazorat qilish uchun BMT missiyasiga zaxira kompaniya sifatida yuborilganini alohida ta’kidladi.
Hozir ham qozog‘istonlik harbiy xizmatchilar BMT missiyalarida xizmat qilmoqda: G‘arbiy Sahroda olti ofitser, Markaziy Afrika Respublikasida ikki ofitser, Kongo Demokratik Respublikasida ikki ofitser, Livanda to‘qqiz nafar harbiy xizmatchi.
Izoh (0)