Қозоғистон ўз тинчликпарвар кучларини Яқин Шарқ ва Африкага юборади

Қозоғистон Яқин Шарқ ва Африка мамлакатларига тинчликпарвар кучларини юборади, деб хабар берди Тengrinews.

Бундай таклиф президент Қосим-Жўмарт Тўқаев томонидан депутатлар муҳокамасига киритилган. Парламент аъзолари тинчликпарвар кучларни юбориш учун якдил овоз берди.

Қозоғистон БМТ миссияларида иштирок этиш учун 430 нафаргача ҳарбийни жўнатади:

• БМТнинг Голан тепаликларидаги кузатувчи кучларига (UNDOF, Сурия —Исроил).
• БМТнинг сулҳ шартлари бажарилишини назорат қилиш органларига (UNTSO, Фаластин — Исроил).
• Жанубий Судан Республикасидаги БМТ миссиясига (UNMISS, Жанубий Судан).
• БМТнинг Абее учун вақтинчалик хавфсизлик кучларига (UNISFА, Судан)

“Қозоғистон Қуролли Кучлари алоҳида ҳарбий хизматчиларни ҳам ҳарбий кузатувчи, ҳам штаб офицерлари, шунингдек, БМТ миссияларида энг кўп талаб қилинадиган пиёда, тиббий, разведка, муҳандислик бўлинмалари билан таъминлашга тайёр”, — деди мудофаа вазири Руслан Жақсилиқов парламент палаталарининг қўшма мажлисида.

Вазир 139 нафар ҳарбий хизматчидан иборат биринчи мустақил миллий тинчликпарвар контингенти ҳарбий техника, қурол-яроғ ва мол-мулк билан биргаликда Голан тепаликларида ҳаракатни назорат қилиш учун БМТ миссиясига захира компания сифатида юборилганини алоҳида таъкидлади.

Ҳозир ҳам қозоғистонлик ҳарбий хизматчилар БМТ миссияларида хизмат қилмоқда: Ғарбий Саҳрода олти офицер, Марказий Африка Республикасида икки офицер, Конго Демократик Республикасида икки офицер, Ливанда тўққиз нафар ҳарбий хизматчи.