O‘zbekistonda avtomobillarni notarial idoraga bormasdan sotish imkoniyati yaratildi

O‘zbekistonda avtomototransport vositasini notarial idoraga bormasdan sotish imkoniyati yaratildi. Bu haqda Adliya vazirligi axborot xizmati xabar berdi. 

Unga ko‘ra, sotuvchi “E-notarius” axborot portalida “Notarial harakatni rasmiylashtirish”ni tanlaydi, o‘zining shaxsiga oid ma’lumotlarni kiritadi va notarial harakatni yaratadi. Sotuvchi sotilayotgan avtomototransport vositasini tanlaydi va narxini kiritadi. Shuningdek, 

• sotuvchi sotib oluvchining  JSHSHIRni, shaxsini tasdiqlovchi hujjat seriyasi va raqamini va telefon raqamini kiritadi;
• sotib oluvchining telefoniga SMS-xabarnoma yuboriladi. Sotib oluvchi havolaga kirib, Face-ID orqali verifikatsiyadan o‘tadi va roziligini tasdiqlaydi; 
• avtomatik tarzda yoki ixtiyoriy  notarius tanlanadi; 
• notarius notarial harakatni rasmiylashtirishga qabul qilib, vaqtni belgilaydi va taraflarning mobil telefoniga SMS-xabarnoma yuboriladi; 
• belgilangan vaqtda notarius taraflar ishtirokida videokonferensaloqa orqali notarial harakatni rasmiylashtiradi;
• bitimning asl nusxalari taraflarga kuryerlik (pochta) xizmati orqali yuboriladi.