Toshkent shahrida avtomobildan tanasini chiqarib, “sayr qilgan” bolalarning ota-onasi javobgarlikka tortildi. Bu haqda IIBB axborot xizmati xabar berdi.
Unga ko‘ra, 16-yanvarga o‘tar kechasi soat 03:30 larda Olmazor tumani Yangi Olmazor ko‘chasida 2005-yilda tug‘ilgan Sh.S. (haydovchilik guvohnomasi mavjud emas) ijaraga olingan Monzaʼda davlat raqamini yechib harakatlangan. Harakatlanish jarayonida transport vositasida tanishlari 2006-yilda tug‘ilgan M.A., 2006-yilda tug‘ilgan M.L., 2009-yilda tug‘ilgan I.A.lar ham bo‘lgan va yo‘l harakati qoidalarini buzgan.
Transport vositasini boshqargan Sh.S. yo‘lovchilar M.L. va I.A.lar tanasini transport vositasidan chiqarib harakatlanishiga ruxsat bergan va ularning hayotini xavf ostiga qo‘ygan.
Mazkur holat yuzasidan voyaga yetmaganlarning ota-onasiga Maʼmuriy javobgarlik to‘g‘risidagi kodeksning 47-moddasiga (bolalarni tarbiyalash va ularga taʼlim berish borasidagi majburiyatlarni bajarmaslik) asosan maʼmuriy bayonnoma rasmiylashtirildi. Avtomobil jarima maydoniga qo‘yildi.
Shuningdek, mashinani boshqarish jarayonida yo‘l harakati qoidalari buzilganligi holati yuzasidan Toshkent shahar IIBB YHXB tomonidan tekshiruv ishlari olib borilmoqda.
Izoh (0)