Toshkentda reportaj olishga borgan “Novosti Uzbekistana” nashri xodimi ichki ishlar xodimlari tomonidan asossiz olib ketilib, bir necha soat idorada ushlab turilgani haqida xabar berilgan edi. Oliy sudning xabar berishicha, jurnalist aybsiz deb topilgan.
Jinoyat ishlari bo‘yicha Uchtepa tuman sudining 2023-yil 16-yanvardagi qaroriga muvofiq Mixail Dovlatov (1986-yilda Toshkent shahrida tug‘ilgan, “Novosti Uzbekistana” internet-nashri muxbiri)ning harakatida ma’muriy huquqbuzarlik alomati yo‘qligi sababli unga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik) va 194-moddasi (ichki ishlar organlari xodimining qonuniy talablarini bajarmaslik) 1-qismi bilan yuritilgan ma’muriy huquqbuzarlik to‘g‘risidagi ish Ma’muriy javobgarlik to‘g‘risidagi kodeksning 271-moddasi (ma’muriy huquqbuzarlik to‘g‘risidagi ishlarni yuritishni istisno etuvchi holatlar) 1-bandiga asosan tugatildi.
Axborot va ommaviy kommunikatsiyalar agentligi holat yuzasidan ma’lumot bergandi. Jurnalistning aytishicha, holat 14-yanvar kuni Uchtepa tumanida sodir bo‘lgan. U 11-dahada istiqomat qiluvchi aholi bilan uchrashishi, ular o‘z navbatida 150 ga yaqin garaj hamda 98 ta daraxt o‘rniga bolalar bog‘chasi qurilayotgani to‘g‘risida ma’lumot berishi kerak bo‘lgan. Dovlatov aholi bilan soat 13:00 da voqea joyida uchrashishga kelishgan. Shuningdek, u yerda Uchtepa tumani hokimligi vakillari, ekolog va boshqa ekspertlar taklif etilgan.
“Avtoturargohga kirishdan 50 metr narida bir guruh erkaklarga ko‘zim tushdi, ularning ayrimlari huquq-tartibot organlari formasida edi, shuningdek, Isuzu avtozaki ham turardi. Ular yonidan o‘tar ekanman, menga murojaat qilishayotganini eshitib qoldim, o‘girilganimda fuqarolik kiyimidagi bittasi yana meni chaqirdi.
Yoniga borib, gap nimada ekanini bilmoqchi bo‘ldim. U esa bu yerda chekish taqiqlanishini aytdi. Men atrofda tamaki chekishni taqiqlaydigan biror belgi yo‘qligini bildirdim. U bo‘lsa, bu yer jamoat joyi hisoblanishi va bu yerda chekish umuman mumkin emasligini aytdi”, — deydi jurnalist.
Shundan so‘ng erkak uni tumanning 2-sonli ichki ishlar idorasiga olib borgan, telefon va texnikalari olib qo‘yilgan. Idorada undan nima uchun miting tashkillashtirmoqchi ekanini so‘rashgan. Bir necha soat IIO FMBda ushlab turilgan jurnalistga nisbatan Ma’muriy javobgarlik to‘g‘risidagi kodeksning 194-moddasi (ichki ishlar organlari xodimining qonuniy talablarini bajarmaslik) bo‘yicha javobgarlik belgilangan.
Axborot va ommaviy kommunikatsiyalar agentligi mazkur holatga huquqiy baho berish hamda huquqni muhofaza qiluvchi organlardan munosabat bildirishlari, shuningdek, kelgusida bunday holatlar takrorlanmasligi maqsadida aniq o‘rganish hamda tegishli xulosa va choralar ko‘rilishi bo‘yicha Bosh prokuraturaga so‘rov xati yuborgan.
“Taʼkidlash joizki, OAV vakillarining kasbiy faoliyati davomida tazyiq ko‘rsatish, to‘sqinlik qilish kabi holatlar so‘z va matbuot erkinligini taʼminlash borasidagi davlat siyosatiga zid bo‘lib, agentlik, o‘z navbatida, barcha darajadagi davlat idoralari xodimlarini axborot qonunchiligi hamda jurnalistlar vakolatlariga hurmat bilan munosabatda bo‘lishga chaqiradi”, — deyiladi agentlik munosabatida.
Izoh (0)