Ўзбекистонда президент қарори билан аҳолига қайтариладиган 1 фоизлик кешбэк суммасига чегаравий миқдор ўрнатилганди. Солиқ қўмитаси кешбэк бўйича чеклов фуқароларнинг 98 фоизига таъсир ўтказмаслигини билдирди.
Президент қарорида жисмоний шахслар томонидан бир ой давомида сотиб олинган товарлар (хизматлар) қийматининг БҲМнинг 60 бараваридан (20,4 миллион сўмдан) ошмаган қисмидан 1 фоизи уларнинг фискал белгили чеклари солиқ органларининг махсус мобил иловаси орқали рўйхатдан ўтказилган тақдирда қайтарилиши белгиланганди. Яъни, энди “Ижтимоий ҳимоя ягона реестри”га кирмаган фуқаронинг харидлари учун ойига олиши мумкин бўлган максимал солиқ кешбэки миқдори 204 минг сўмни ташкил этади.
Солиқ қўмитаси бош инспектори Анвар Неъматов ушбу чеклов фойдаланувчиларнинг 98 фоизига, яъни ой давомида одатда 20,4 миллион сўмгача миқдорда харидларни амалга оширувчиларга таъсир қилмаслигини айтди.
“Биргина 2023 йил ноябрь ойини таҳлил қиладиган бўлсак, кешбэк тизимидан фойдланувчи юртдошларимизнинг 98 фоизи максимал 200 минг сўм кешбэк тўплаган. Бу мазкур чегаравий миқдор адолатли ва тўғри қўйилганини билдиради”, — дейди қўмита вакили.
Унинг билдиришича, бошқа шахсларга тегишли чеклар суммасини ўзлаштириш ёки тадбиркорлар томонидан чекни харидорга бермасдан, ўзлари ёки қариндошлари томонидан ўтказиш ҳолатлари юзасидан шикоятлар кўплиги сабабли мазкур тартиб жорий этилди.
Изоҳ (0)