Davlat aktivlarini boshqarish agentligi “O‘zbekiston shampani” AJning ustav kapitalidagi davlat aksiyalar paketini sotish bo‘yicha kelishuvga erishilganini ma’lum qildi.
Qayd etilishicha, agentlik tomonidan eng maqbul takliflarni tanlab olish asosida KPMG xalqaro kompaniyasi xususiylashtirish bo‘yicha konsultant sifatida jalb etilgan. Natijada investorlardan sotib olish bo‘yicha qiziqish to‘g‘risidagi 5 ta arizalar (Express of Interest) kelib tushgan.
Talabgorlar xususiylashtirish jarayonida ishtirok etilishini taqiqlashi mumkin bo‘lgan maʼmuriy, hakamlik yoki boshqa sud jarayonlarining yo‘qligi hamda Yevropa Ittifoqi va AQSHning, shuningdek, yirik xalqaro moliya institutlarining sanksiyalari ro‘yxatiga kiritilmagani yuzasidan o‘rganilgan.
Kelib tushgan takliflar orasida eng yuqori narx taklifi bildirgan, kelajakda jamiyat faoliyatini barqaror rivojlanishini taʼminlay oladigan va ishlab chiqarish jarayonlarini to‘liq davomiyligini shakllantirishga salohiyatli bo‘lgan Euro Pack MCHJ, “O‘zbekiston shampani” AJ ustav kapitalidagi 51,48 foiz davlat aksiyalar paketini sotib olish uchun qo‘yilgan talablarga to‘liq javob bergan va 72 milliard so‘m sotib olish to‘lovi bilan g‘olib deb topilgan.
Shu bilan birga, xaridorning taklifi xalqaro konsultant tomonidan hisoblangan korxonaning indikativ narxlar oralig‘ining yuqori qismida joylashgan hamda korxonaning baholangan qiymatidan yuqori.
Korxonani xususiylashtirish natijalari Davlat aktivlarini xususiylashtirish va xususiylashtirish jarayonlarini muvofiqlashtirish davlat komissiyasining tegishli qarori bilan maʼqullangan.
Xaridor sotib olish to‘loviga qo‘shimcha ravishda 2024—2025-yillarda korxonani rivojlantirish uchun 18,5 million dollar miqdorida investitsiya kiritish, bunda ishlab chiqarish quvvatlarini rekonstruksiya va modernizatsiya qilish, konyak spirtini ishlab chiqarish uskunasini va saqlash uchun dub bochkalarini o‘rnatish, shu bilan birga, gastronomik turizmni rivojlantirish va rivojlangan bu kabi ishlab chiqarishning samarali tajribasidan kelib chiqib, Korxona hududida restoran va degustatsiya zalini tashkil etish, Parkent tumanida uzumchilik plantatsiyasini tashkil etish hamda vinoturizm maskanini barpo etish kabi majburiyatlarni o‘z zimmasiga oladi.
Kompaniya haqida ma’lumot
“O‘zbekiston shampani” Toshkent shahrida joylashgan bo‘lib, 1942-yilda ishga tushirilgan. Kompaniyaning asosiy faoliyat turi shampan va boshqa gazlangan sharob ichimliklarini ishlab chiqarish, shuningdek, sharob materiallariga ishlov berishdan iborat.
2021-yil yakuniga ko‘ra, kompaniyaning sof tushumi 65,6 mlrd so‘mni, sof foydasi 2 mlrd so‘mni hamda sof aktivi 12 mlrd so‘mni tashkil etgan.
Izoh (0)