Тошкент шаҳар Чилонзор туманида янги йил кечаси қўпол қоидабузарлик содир этган йигитлар жавобгарликка тортилди. Бу ҳақда “Вазият 24” информацион дастурида маълум қилинди.
Қайд этилишича, 2024 йил 1 январь куни соат 00:10 да Чилонзор тумани Сўгалли ота кўчасида жойлашган “Зарҳал” тўйхонаси олдида тўрт нафар фуқаро бир нечта машинада турли авариявий ҳолатлар содир этиб, автомобиль бошқарган.
Ушбу фуқаролар ҳудудда хизмат олиб бораётган ички ишлар ходимларининг қонуний талабларига бўйсунмасдан, жамиятда юриш-туриш қоидаларини қасддан бузган. Шунингдек, вояга етмаган икки нафар шахснинг ота-онасига нисбатан Маъмурий жавобгарлик тўғрисидаги кодекснинг 47-модда (болаларни тарбиялаш ва уларга таълим бериш борасидаги мажбуриятларни бажармаслик) 1-қисми билан чора кўрилган.
Аниқланишича, шу куни қоидабузарлик содир этиб, машина ҳайдаган шахсларнинг бирортасида ҳайдовчилик гувоҳонаси бўлмаган.
Жиноят ишлари бўйича Чилонзор туман суди томонидан тўрт нафар фуқаро Маъмурий жавобгарлик тўғрисидаги кодекснинг 183 (майда безорилик) ҳамда 194-моддаларида (Ички ишлар органлари ходимининг қонуний талабларини бажармаслик) назарда тутилган ҳуқуқбузарликни содир этганликда айбли деб топилди. Уларнинг ҳар бирига БҲМнинг бир баравари миқдорида (340 минг сўм) жарима ҳамда 15 сутка маъмурий қамоқ жазоси тайинланди.
Самарқанд шаҳрида 2023 йил 1 январга ўтар кечаси Mercedes-Benz’да дрифт қилган ҳайдовчи жавобгарликка тортилган эди. Ундан олдин эса Нукусда рақамсиз ҳаракатланиб, дрифт қилган “шумахер” топилганди.
Изоҳ (0)