Otello, Yusufbek hoji, Kreonat, Shohjahon, Karenin singari rollari bilan o‘zbek teatri tarixida munosib iz qoldirgan, sahnada Abu Rayhon Beruniy, Ali Qushchi, Alisher Navoiy, Zahiriddin Muhammad Bobur, Zokirjon Xolmuhammad o‘g‘li Furqat, Abay kabi tarixiy siymolarni gavdalantirib, shon-shuhrat qozongan Yoqub Ahmedov bugun 86 yoshga to‘ldi.
1938-yil 3-yanvarda Namanganda tug‘ilgan ustoz sanʼatkor 1958-yili Toshkent teatr va rassomlik sanʼati institutini tugatgan. Shundan so‘ng uzoq yillar davomida O‘zbek Milliy akademik drama teatrida faoliyat yuritgan, 20 yildan ziyodroq ushbu teatr jamoasiga rahbarlik qilgan Yoqub Ahmedovning o‘zbek kinosi va teatr sanʼati rivojiga qo‘shgan ulkan hissasi uchun O‘zbekiston xalq artisti faxriy unvoni hamda “Do‘stlik” ordeni bilan taqdirlangan.
Mahoratli aktyor, shuningdek, maʼlum muddat O‘zbekiston teatr arboblari uyushmasiga ham raislik qilgan, yillar davomida orttirgan tajriba va bilimlarini yosh avlodga o‘rgatish maqsadida 2015-yili Milliy akademik drama teatrida “Aktyorlik mahorati maktabi”ga asos solgandi.
Rejissor Yo‘ldosh Aʼzamov tomonidan 1958-yilda suratga olingan “Furqat” badiiy filmidagi Furqat roli uni kino sanʼati muxlislariga ilk bor tanitgan obraz bo‘lib qoldi. Shundan so‘ng Ahmedov kinoda ham yuzdan ziyod rollarni ijro etdi. Mahoratli aktyor “O‘zbekfilm” kinostudiyasida dublyaj qilingan to‘rt yuzdan ortiq filmlarga ovoz bergan.
Madaniyat vazirining birinchi o‘rinbosari Avazxon Tadjixonov bugun, 3-yanvar kuni qutlug‘ yoshni qarshilagan ustoz sanʼatkorni yo‘qlab, Ahmedovlar xonadoniga bordi hamda vazirlikning esdalik sovg‘alarini topshirdi.
“El suygan sanʼatkor Yoqub Ahmedov bugun farzandlari-yu nevaralari ardog‘ida. Ustoz rol ijro etgan spektakllar o‘zbek teatr va kino sanʼatining oltin fondidan joy olgan desam, mubolag‘a bo‘lmaydi. Ayniqsa, u kishining ulug‘ ajdodlarimiz siymosini gavdalantirgan rollarini alohida taʼkidlab o‘tishim kerak. Bularning barchasi o‘sib kelayotgan va kelgusi avlodlar uchun bebaho meros bo‘lib qoladi. Ana shunday sanʼatkor bilan zamondosh ekanimizdan faxrlanaman”, — deydi vazir o‘rinbosari.
O‘z navbatida Yoqub Ahmedov ham ko‘rsatilgan eʼtibor uchun minnatdorlik bildirdi.
Izoh (0)