Отелло, Юсуфбек ҳожи, Креонат, Шоҳжаҳон, Каренин сингари роллари билан ўзбек театри тарихида муносиб из қолдирган, саҳнада Абу Райҳон Беруний, Али Қушчи, Алишер Навоий, Заҳириддин Муҳаммад Бобур, Зокиржон Холмуҳаммад ўғли Фурқат, Абай каби тарихий сиймоларни гавдалантириб, шон-шуҳрат қозонган Ёқуб Аҳмедов бугун 86 ёшга тўлди.
1938 йил 3 январда Наманганда туғилган устоз санъаткор 1958 йили Тошкент театр ва рассомлик санъати институтини тугатган. Шундан сўнг узоқ йиллар давомида Ўзбек Миллий академик драма театрида фаолият юритган, 20 йилдан зиёдроқ ушбу театр жамоасига раҳбарлик қилган Ёқуб Аҳмедовнинг ўзбек киноси ва театр санъати ривожига қўшган улкан ҳиссаси учун Ўзбекистон халқ артисти фахрий унвони ҳамда “Дўстлик” ордени билан тақдирланган.
Маҳоратли актёр, шунингдек, маълум муддат Ўзбекистон театр арбоблари уюшмасига ҳам раислик қилган, йиллар давомида орттирган тажриба ва билимларини ёш авлодга ўргатиш мақсадида 2015 йили Миллий академик драма театрида “Актёрлик маҳорати мактаби”га асос солганди.
Режиссёр Йўлдош Аъзамов томонидан 1958 йилда суратга олинган “Фурқат” бадиий фильмидаги Фурқат роли уни кино санъати мухлисларига илк бор танитган образ бўлиб қолди. Шундан сўнг Аҳмедов кинода ҳам юздан зиёд ролларни ижро этди. Маҳоратли актёр “Ўзбекфильм” киностудиясида дубляж қилинган тўрт юздан ортиқ фильмларга овоз берган.
Маданият вазирининг биринчи ўринбосари Авазхон Таджихонов бугун, 3 январь куни қутлуғ ёшни қаршилаган устоз санъаткорни йўқлаб, Аҳмедовлар хонадонига борди ҳамда вазирликнинг эсдалик совғаларини топширди.
“Эл суйган санъаткор Ёқуб Аҳмедов бугун фарзандлари-ю неваралари ардоғида. Устоз рол ижро этган спектакллар ўзбек театр ва кино санъатининг олтин фондидан жой олган десам, муболаға бўлмайди. Айниқса, у кишининг улуғ аждодларимиз сиймосини гавдалантирган ролларини алоҳида таъкидлаб ўтишим керак. Буларнинг барчаси ўсиб келаётган ва келгуси авлодлар учун бебаҳо мерос бўлиб қолади. Ана шундай санъаткор билан замондош эканимиздан фахрланаман”, — дейди вазир ўринбосари.
Ўз навбатида Ёқуб Аҳмедов ҳам кўрсатилган эътибор учун миннатдорлик билдирди.
Изоҳ (0)