Janubiy koreyalik bir guruh abituriyentlar oliy o‘quv yurtlariga o‘qishga kirish uchun yillik milliy imtihon vaqti 90 soniyaga qisqargani sababli mamlakat rasmiylariga qarshi jamoaviy da’vo arizasi bilan chiqdi.
Hozircha 39 nafar da’vogarni o‘z ichiga olgan guruh ularning har biri uchun 20 million von (15,4 ming dollar) miqdorida tovon puli talab qilmoqda. Bu muhim imtihonni qayta topshirish uchun bir yil davomida o‘qishga ketadigan pul miqdoriga teng. Bu haqda BBC xabar bermoqda.
Janubiy Koreyadagi “Suneung” — Milliy kirish imtihoni dunyodagi eng og‘ir imtihonlardan biri hisoblanadi. Imtihon bir kunda barcha fanlarni sinovdan o‘tkazishni nazarda tutadi, shuning uchun imtihon bir necha tanaffuslar bilan taxminan 8 soat davom etadi. Imtihondan muvaffaqiyatli o‘tish (90-100 ball) talabalarga nufuzli universitetlarga kirish imkonini beradi. An’anaga ko‘ra, “Suneung” noyabr oyining o‘rtalari va oxirlarida o‘tkaziladi, natijalar dekabr oyining birinchi yarmida ma’lum bo‘ladi.
Da’vogarlarning so‘zlariga ko‘ra, bu gal test yakunlanganini bildiruvchi qo‘ng‘iroq birinchi sinov vaqtida bir yarim daqiqa oldin yangradi. Komissiya vaqtni nazorat qilishda xatolikni tan oldi va tanaffusdan keyin bir yarim daqiqa qo‘shib qo‘ydi, lekin shu bilan birga faqat tugallanmagan vazifalarni bajarishga ruxsat berdi va yozib bo‘lingan vazifalarni tuzatishga imkon berilmadi. Talabalarning fikriga ko‘ra, bu vaziyat ularni shunchalik bezovta qilganki, ular qolgan testlarga javob berishda e’tiborlarini jamlay olmadilar va o‘z bilganlaridan ko‘ra yomonroq javob berishdi.
Imtihon vaqtini noto‘g‘ri belgilash bo‘yicha shunga o‘xshash da’volar avval ham Janubiy Koreyada qo‘zg‘atilgan. Joriy yilning aprel oyida 2021-yildagi testlardan biri ikki daqiqaga qisqaroq bo‘lganidan shikoyat qilgan daʼvogarlar guruhining har biriga 5250 dollar miqdorida tovon puli berilgandi.
Izoh (0)