Moskvada politsiya xodimlari gumonlanuvchini qo‘lga olishga to‘sqinlik qilishga uringan 80 dan ortiq xorijlikni qo‘lga oldi, deb xabar bermoqda “Interfaks”.
Ma’lum qilinishicha, 15-dekabr kuni politsiyachi 21 yoshli migrantning hujjatlarini tekshirishga uringanida u talabga bo‘ysunmay, politsiyachini o‘z avtomobilida bir necha metr sudrab, qochishga uringan. So‘ng mashinadan tushib, politsiya xodimini bir necha marta urgan.
Huquqbuzarni epileptik tutqanoq tutgan, politsiya xodimi unga birinchi tibbiy yordam ko‘rsatgan va tez yordam chaqirgan. Erkak tibbiy muassasaga olib ketilgan, u yerdan politsiya xodimlari hamrohligida qo‘yib yuborilgan.
Huquqbuzarga yordam ko‘rsatilayotgan paytda 80 dan ortiq tajovuzkor fuqaro politsiya xodimlariga yaqinlashib, xizmat avtomashinasi g‘ildiraklarini teshib, qo‘lga olingan fuqarodan uzoqlashtirishga uringan. Voqea joyiga qo‘shimcha politsiya otryadlari yetib kelgan. Noqonuniy xatti-harakatlarning oldini olish uchun politsiya xizmat qurolidan havoga bir necha marta ogohlantiruvchi o‘q uzgan.
Qayd etilishicha, voqea ortidan 82 nafar fuqaro ushlanib, hududiy boshqarmaga olib ketilib, ularga nisbatan mayda bezorilik va immigratsiya qonunchiligini buzganlik moddalari bo‘yicha maʼmuriy bayonnomalar tuzilgan. Politsiya xodimiga qarshilik ko‘rsatgan avtomobil haydovchisiga nisbatan esa hokimiyat vakiliga zo‘ravonlik va hokimiyat vakilini haqorat qilish moddalari bo‘yicha jinoyat ishi qo‘zg‘atilgan.
Izoh (0)