Rossiya Ichki ishlar vazirligi noqonuniy migrantlar uchun bir qator cheklovlarni nazarda tutuvchi “nazorat ostida qolish” rejimi to‘g‘risidagi qonun loyihasini tayyorladi. Bu haqda “TASS” xabar berdi.
Qonun loyihasiga ko‘ra, vaqtinchalik Rossiyada qolish muddati o‘tgan yoki migratsiya ro‘yxatidan o‘tkazishda ataylab yolg‘on ma’lumot yoki hujjatlar taqdim etgan chet el fuqarolari maxsus reyestrga kiritiladi. Ushbu reyestrga vizasi, qochqinlik maqomi, vaqtinchalik boshpana yoki fuqaroligi bekor qilinganlar ham kiradi.
Ular uchun Ichki ishlar vazirligi avtomobil sotib olishni, yakka tartibdagi tadbirkor sifatida ro‘yxatdan o‘tishni, shuningdek, ko‘chmas mulkni kadastr reyestrida qayd etishni taqiqlashni taklif qilmoqda.
Shuningdek, “nazorat ostida qolish” rejimidagi xorij fuqarolarining avtomobil haydashini cheklash taklif qilinmoqda. Ularga “prava” berish yoki almashtirish, hisob ochish, pul o‘tkazish yoki turmush qurish rad etilishi mumkin.
Taxminlarga ko‘ra, migrantlar o‘zlarining joylashgan joyi, yashash joyi o‘zgargani, shuningdek, Rossiyadan chiqib ketish sanasi, joyi va yo‘nalishi to‘g‘risida Ichki ishlar vazirligiga ham ma’lum qilishlari kerak bo‘ladi. Huquqbuzarliklar uchun xorijliklarni deportatsiya qilish yoki “maxsus muassasalarga” joylashtirish taklif etiladi.
Izoh (0)