Москвада полиция ходимлари гумонланувчини қўлга олишга тўсқинлик қилишга уринган 80 дан ортиқ хорижликни қўлга олди, деб хабар бермоқда “Интерфакс”.
Маълум қилинишича, 15 декабрь куни полициячи 21 ёшли мигрантнинг ҳужжатларини текширишга уринганида у талабга бўйсунмай, полициячини ўз автомобилида бир неча метр судраб, қочишга уринган. Сўнг машинадан тушиб, полиция ходимини бир неча марта урган.
Ҳуқуқбузарни эпилептик тутқаноқ тутган, полиция ходими унга биринчи тиббий ёрдам кўрсатган ва тез ёрдам чақирган. Эркак тиббий муассасага олиб кетилган, у ердан полиция ходимлари ҳамроҳлигида қўйиб юборилган.
Ҳуқуқбузарга ёрдам кўрсатилаётган пайтда 80 дан ортиқ тажовузкор фуқаро полиция ходимларига яқинлашиб, хизмат автомашинаси ғилдиракларини тешиб, қўлга олинган фуқародан узоқлаштиришга уринган. Воқеа жойига қўшимча полиция отрядлари етиб келган. Ноқонуний хатти-ҳаракатларнинг олдини олиш учун полиция хизмат қуролидан ҳавога бир неча марта огоҳлантирувчи ўқ узган.
Қайд этилишича, воқеа ортидан 82 нафар фуқаро ушланиб, ҳудудий бошқармага олиб кетилиб, уларга нисбатан майда безорилик ва иммиграция қонунчилигини бузганлик моддалари бўйича маъмурий баённомалар тузилган. Полиция ходимига қаршилик кўрсатган автомобиль ҳайдовчисига нисбатан эса ҳокимият вакилига зўравонлик ва ҳокимият вакилини ҳақорат қилиш моддалари бўйича жиноят иши қўзғатилган.
Изоҳ (0)