O‘zbekiston dunyoning 100 ta eng yaxshi oshxonalari reytingidan o‘rin oldi, deb xabar beradi TasteAtlas portal.
Mazkur reyting mijozlar tomonidan qoldirilgan 395 mingdan ortiq taomlar ro‘yxati va 115 mingdan ortiq berilgan baholar asosida tuzilgan.
Birinchi o‘rinni Italiya milliy oshxonasi egalladi — mijozlar uning pitssa, rizotto, talyatelle, pasta va ravioli kabi taomlariga yuqori baho bergan. Ikkinchi o‘rinni sushi, ramyon, sashimi, yakitori va mochi kabi taomlari bilan Yaponiya oshxonasi egalladi. Uchinchi o‘rin Gretsiyaga nasib etdi — ushbu mamlakatning giros, suvlaki, mussaka, yunoncha salat va pastitsio kabi taomlari bilan e’tirof etilgan.
O‘zbekiston oshxonasi reytingda 76-o‘rinni egalladi. Mijozlar lag‘mon, palov, obi non va mantiga yuqori baho bergan.
Rossiya oshxonasi reytingda 41-o‘rinda. Markaziy Osiyo davlatlari orasida Qozog‘iston 90-o‘rinda, Qirg‘iziston 92-o‘rinda qayd etilgan. Tojikiston va Turkmaniston reytingga kirmagan.
Ma’lumot uchun, O‘zbekistonda eng ommaviy taom — osh narxlari to‘g‘risidagi ma’lumotlarni shakllantiruvchi “Palov indeksi” 2020-yilning yanvaridan joriy etilgan. Ushbu ma’lumotlarni shakllantirishda respublikaning barcha hududlarida 1 kilogramm palov tayyorlash uchun sarflanadigan masalliqlar miqdori o‘rganib chiqiladi. Shunga ko‘ra, umumiy ovqatlanish muassasalarida bir porsiya palovning o‘rtacha narxi belgilanadi.
Izoh (0)