Ўзбекистон дунёнинг миллий ошхоналар рейтингида 76-ўринни эгаллади

Ўзбекистон дунёнинг 100 та энг яхши ошхоналари рейтингидан ўрин олди, деб хабар беради ТаsteAtlas портал. 

Мазкур рейтинг мижозлар томонидан қолдирилган 395 мингдан ортиқ таомлар рўйхати ва 115 мингдан ортиқ берилган баҳолар асосида тузилган. 

Биринчи ўринни Италия миллий ошхонаси эгаллади — мижозлар унинг пицца, ризотто, талятелле, паста ва равиоли каби таомларига юқори баҳо берган. Иккинчи ўринни суши, рамён, сашими, якитори ва мочи каби таомлари билан Япония ошхонаси эгаллади. Учинчи ўрин Грецияга насиб этди — ушбу мамлакатнинг гирос, сувлаки, муссака, юнонча салат ва пастицио каби таомлари билан эътироф этилган.

Ўзбекистон ошхонаси рейтингда 76-ўринни эгаллади. Мижозлар лағмон, палов, оби нон ва мантига юқори баҳо берган.  

Россия ошхонаси рейтингда 41-ўринда. Марказий Осиё давлатлари орасида Қозоғистон 90-ўринда, Қирғизистон 92-ўринда қайд этилган. Тожикистон ва Туркманистон рейтингга кирмаган.

Маълумот учун, Ўзбекистонда энг оммавий таом — ош нархлари тўғрисидаги маълумотларни шакллантирувчи “Палов индекси” 2020 йилнинг январидан жорий этилган. Ушбу маълумотларни шакллантиришда республиканинг барча ҳудудларида 1 килограмм палов тайёрлаш учун сарфланадиган масаллиқлар миқдори ўрганиб чиқилади. Шунга кўра, умумий овқатланиш муассасаларида бир порция паловнинг ўртача нархи белгиланади.