Макроиқтисодий ва ҳудудий тадқиқотлар институти Тошкентдаги йирик супермаркетларда озиқ-овқат маҳсулотлари нархини ўрганди.
Қайд этилишича, институт мутахассислари томонидан декабрь ойида пойтахтдаги йирик супермаркетларда 21 номдаги озиқ-овқат маҳсулотлари нархининг ўзгариши кўриб чиқилган.
Натижада 8 хил маҳсулот бўйича ўтган ойдагига нисбатан минимал нархлар пасайгани аниқланган. Хусусан, оқ карам 22 фоизга, гуруч 15,6 фоизга, қизил сабзи 10 фоизга, кунгабоқар ёғи 7,4 фоизга, сариқ пиёз 6,8 фоизга, маргарин 6,6 фоизга, лимон 5,6 фоизга ҳамда лавлаги 5,1 фоизга пасайган.
Бундан ташқари, 4 номдаги маҳсулот нархлари ошган. “Айниқса, помидор ва бодринг нархининг ошиши яққол сезилади. Шуни таъкидлаш керакки, худди шундай тенденция ўтган йилда ҳам кузатилганди. Бу эса ушбу маҳсулотларни бозорга этказиб беришда мавсумий омилларнинг таъсири борлигидан далолат беради”, — дейилади хабарда.
Таҳлилларга кўра, 9 номдаги маҳсулотнинг энг паст нархлари ўзгаришсиз қолган. Уларнинг орасида гречка, сут, буғдой уни кабилар бор.
Эслатиб ўтамиз, май ойида Ўзбекистон Марказий банки 2023 йил биринчи чораги учун “Истеъмол кайфияти шарҳи”ни эълон қилганди. Тадқиқотда респондентларнинг даромадлари ва харажатлари, уларнинг жамғармага мойиллиги, шунингдек, келажакдаги эҳтиёжлари таҳлил қилинган.
Қайд этилишича, ўтган даврда истеъмол кайфият индекси 2022 йилнинг IV чорагига нисбатан 2,3 бандга камайиб, 23,9 бандни ташкил этган.
Изоҳ (0)