Lionel Messining JCH—2022 da kiygan liboslari kimoshdi savdosida 7,8 million dollarga sotildi

Lionel Messining liboslar kolleksiyasi kimoshdi savdosida sotildi.

Noyabr oyida Nyu-Yorkdagi Sotheby’s auksioni Argentina terma jamoasi hujumchisining JCH—2022 da kiygan 6 ta libosini kimoshdi savdosiga qo‘ygan edi. Kolleksiyadan Messining guruh bosqichidagi ikkita, 1/8 finaldagi, chorak finaldagi, yarim final va finalning birinchi bo‘limida kiygan liboslari o‘rin olgan.

Savdo 14-dekabr, payshanba kuni yakuniga yetdi va sotuv narxi 7.803.000 dollarni tashkil etdi. Qayd etilishicha, u belgilangan muddat tugashiga bir necha daqiqa qolganida amalga oshirilgan — bunga qadar esa kimoshdi savdosiga 6,5 million dollardan oshmaydigan 3 ta ariza kelib tushgan.

Messining liboslari sotuvidan tushgan mablag‘ni bir qismi xayriya ishlariga yo‘naltirilishi xabar qilingan.

Sport bilan bog‘liq sotilgan eng qimmat narsa Maykl Jordanning 1998-yil NBA finali 1-o‘yin libosi bo‘lib turibdi. U kimoshdi savdosida 8,1 million funt sterlingga sotilgan.