Самарқанд вилоятида пиёданинг ўлимига сабабчи бўлган Malibu ҳайдовчисига жазо тайинланди. Бу ҳақда “Замон” информацион дастурида маълум қилинди.
Маълум қилинишича, 20 август куни соат 00:36 ларда 4П-47 автомобиль йўлининг Ургут тумани “Боғишамол” маҳалласидан ўтган 59-километрида ЙТҲ содир бўлган. Malibu автомобили йўлни кесиб ўтишга уринган пиёдани уриб юборган.
Ҳайдовчи жабрланувчини энг яқин шифохонага олиб борган, бироқ кўрсатилган тиббий ёрдамга қарамай, у вафот этган.
Жиноят ишлари бўйича Ургут туман судида мазкур жиноят иши кўриб чиқилди. Суд давомида ҳалок бўлган йигитнинг отаси ўғли спорт билан шуғуллангани, бир неча бор чемпионатларда қатнашиб, ғолиб бўлиб келганини таъкидлаб, судланувчига оғир жазо берилишини сўраган. Унинг айтишича, ҳайдовчи жуда катта тезликда ҳаракатланиб, ҳатто тормоз ҳам босмаган.
Ҳайдовчи Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисмида назарда тутилган жиноятни содир этганликда айбдор деб топилиб, суд ҳукми билан 6 йил муддатга озодликдан маҳрум қилиш жазоси тайинланди.
Ўзбекистонда 2023 йилнинг январь—август ойлари давомида 1415 нафар фуқаро йўл-транспорт ҳодисаси оқибатида вафот этди. Ўтган саккиз ойда мамлакатда 9 миллиондан ортиқ йўл ҳаракати қоидабузарлиги қайд этилган. Буларнинг 8 миллионга яқини қўпол қоидабузарликлар, 26 мингга яқини транспорт воситасини маст ҳолда бошқариш, 161 мингдан ортиқ пиёдалар қоидабузарлиги билан боғлиқ.
Изоҳ (0)