Toshkentning uchta tumani hududida elektr energiyasi ta’minoti o‘chiriladi

Toshkentning ayrim tumanlarida 5-dekabr kuni elektr taʼminoti vaqtincha to‘xtatiladi, deb xabar beradi “Hududiy elektr tarmoqlari” matbuot xizmati.

Qayd etilishicha, isteʼmolchilarga sifatli va barqaror elektr energiyasi yetkazib berilishini taʼminlash, elektr tarmoqlaridagi avariyaviy holatlarni oldini olish, kuz-qish mavsumiga puxta tayyorgarlik ko‘rish maqsadida 5-dekabr kuni quyidagi manzillarda elektr taʼminoti vaqtincha o‘chirildi:

• Yashnobod tumani — “Yangi davr” MFYning ayrim hududlarida soat 09:00 dan 17:00 gacha;
• Bektemir tumani — “Gulbog”, “Musaffo”, “Nurli yol” hamda “Sohil” MFYlarining ayrim hududlarida 09:00 dan 17:00 gacha;
• Mirzo Ulug‘bek tumani — “Iqtidor”, “Ijodkor”, “Alisherobod”, “Chingeldi” hamda “Temuriylar” MFYlarining ayrim hududlarida soat 07:00 dan 09:00 gacha.

Taʼmirlash ishlari belgilangan vaqtdan avvalroq yakunlanishi mumkinligi aytilmoqda.

“Hududiy elektr tarmoqlari” AJ Toshkent shahar filiali mazkur taʼmirlash ishlari tufayli elektr taʼminotidagi vaqtincha uzilishlar sababli yetkazilayotgan noqulayliklar uchun ushbu hududlarda yashovchi isteʼmolchilardan uzr so‘raydi.

Avvalroq O‘zbekiston energetika vaziri Jo‘rabek Mirzamahmudov “Daryo” nashriga bergan intervyusida energetika tizimining qish mavsumiga tayyorgarlik jarayonlari, metan zapravkalardagi turnaqator navbatlar, AES qurilishi va toifalangan to‘lovlar hamda ayrim nopok isteʼmolchilar haqida gapirgandi.