Sirdaryo viloyati Sirdaryo tumanida katta miqdordagi soliqlarni to‘lashdan bosh tortgan fuqaroga chora ko‘rildi. Bu haqda “Daryo”ga Majburiy ijro byurosi xabar qildi.
Qayd etilishicha, MIBning tuman bo‘limi ish yurituvida tumanda faoliyat yuritib kelayotgan "Sholikor qum shag‘al invest" MCHJdan davlat foydasiga 1 milliard so‘mdan ortiq soliq va davlat boji to‘lovlari o‘z vaqtida to‘lashdan bo‘yin tovlab kelgani aniqlangan. Davlat soliq organlarining qarzdorliklarini hamda sudlarning davlat bojlari undirish to‘g‘risidagi ijro hujjatlari byuroning Sirdaryo tuman bo‘limi ish yurituviga qabul qilinib, ijro harakatlariga kirishilgan.
Qarzdorning mol-mulklarini aniqlash maqsadida tegishli tashkilotlarga so‘rovnoma yuborilib o‘rganilganda qarzdor jamiyatga tegishli bo‘lgan Malibu avtotransport vositasi borligi aniqlanib, xatlangan va vaqtincha saqlash uchun jarima maydonchasiga olib kelingan.
Tadbirkor davlat oldidagi qarzdorliklarni belgilangan muddatlarda bartaraf etilmagani sababli avtotransport vositasi tegishli tartibda 314 million so‘mga baholangan. Hozirda xatlangan mulkni onlayn auksion savdolari orqali realizatsiya qilinish choralari ko‘rilmoqda.
Izoh (0)